Banka Europiane për Rindërtim dhe Zhvillim (BERZH) në bashkëpunim me Organizatën Botërore të Turizmit të Kombeve të Bashkuara kanë shprehur mbështetjen e tyre për rimëkëmbjen e sektorit të turizmit në Shqipëri, që është dhe një nga sektorët më të prekur nga Covid-19.

Në një njoftim për shtyp, BERZH bën të ditur se: “Përhapja e shpejtë e koronavirusit ka pasur ndikim masiv në shumë sektorë të ekonomisë globale, me turizmin duke qenë ndër më të goditurit. Banka Europiane për Rindërtim dhe Zhvillim (EBRD) dhe Organizata Botërore e Turizmit e Kombeve të Bashkuara (UNWTO) po bashkojnë forcat për të rritur rimëkëmbjen e sektorit të turizmit në 38 ekonomitë ku banka investon”.

Sipas analizës së Organizatës Botërore të Turizmit të Kombeve të Bashkuara, të gjitha destinacionet në të gjithë botën patën kufizime në udhëtime si pasojë e Covid-19.

Shqipëria, Armenia, Kroacia, Egjipti, Greqia, Jordania, Libani, Mali i Zi, Maroku, Tunizia, Turqia dhe Uzbekistani janë ndër vendet për të cilat është parashikuar mbështetje në sektorin e turizmit.

Sipas BERZH, Paketa e Ndihmës Teknike për Rimëkëmbjen e Turizmit e miratuar kohët e fundit, nga UNWTO përfshin tre shtylla nëpërmjet të cilave organizata planifikon që të ndihmojë sektorin: rimëkëmbjen ekonomike; marketingun si dhe ndërtimin e rezistencës.

BERZH po ndihmon shumë vende të luftojnë ndikimin ekonomik të pandemisë së Covid-19, falë investime të tij.