Ilir Seferi nga fondacioni “Besa” në Bavari ka shpjeguar rolin e Diasporës në kohën e COVID-19. Pasojat e këtij virusi i ndjejnë kryesisht njerëzit e varfër dhe fondacioni “Besa” ka dhënë ndihmë konkrete për këto familje.
Dje në Komunën e Podujevës ata ndihmuan familjet në nevojë duke shpërndarë pako me ushqime. Pakot përmbanin produktet bazike dhe higjenizuese për një familje të mjaftueshme në 2 javë dhe produktet janë të gjitha të prodhuara në Kosovë. Sipas kësaj organizate shpërndarja e këtyre ndihmave do të vazhdojë deri në përfundim të pandemisë.
“Fondacioni “Besa” është një rrjet biznesesh i formuar në 2010 në Bavari dhe punojmë vetëm në këtë rajon. Puna jonë bazohet në 4 shtylla: arsim, kulturë, ekonomi dhe në marrëdhëniet me vende të tjera. Një nga projektet më themelore që ne mbështesim është arsimi shqip në Bavari dhe e finacojmë prej vitesh. Ne ndihmojmë mësuesit dhe ata na ndihmojnë fëmijët tanë. Prej vitit 2014 me anë të një marrëveshje që ne kemi bërë me qeverinë e Kosovës kemi marrë 20 studentë kosovarë duke i mësuar ata për një profesion të caktuar, që do të thotë ata kanë bërë shkollë profesionale këtu në Gjermani. Këtë vit ata mbarojnë studimet e tyre dhe do të kthehen në Kosovë si profesionistë”, shprehet Ilir Seferi.
Sipas tij Oda Ekonomike në Kosovë duhet të jetë në bashkëpunim me shkollat profesionale. Një projekt që ata kanë së fundmi është promovimi në Bavari i produkteve të prodhuara në Kosovë. Këtu përfshihen rreth 128 firma dhe secila firmë e ka të paktën 1 partner gjerman dhe kjo do të jetë si një urë lidhëse mes vendeve.
Burimi origjinal, këtu:
