Hungaria lehtëson masat e marra në luftën ndaj pandemisë Covid-19. Ambasada Shqiptare në Hungari komunikon se ditën e hënë (18 maj) do të hiqen kufizimet e lëvizjes, si dhe do të përdoren parqet dhe hapësirat publike. Dyqanet dhe bizneset do të hapen, sikurse banjat termale në mjedise të hapura dhe muzetë.
Dasmat dhe meshat mund të fillojnë të mbahen që nga java e ardhshme. Ndërsa festat familjare duhet të organizohen me më pak se 200 të ftuar, megjithatë, mund të zhvillohen vetëm pas 15 qershorit në Budapest dhe nga 1 qershori jashtë kryeqytetit.
Ambasada Shqiptare në Hungari thekson se mbajtja e një distance të sigurt 1.5 metra do të jetë e detyrueshme, sikundër edhe mbajtja e maskave në dyqane e transport publik. Koha e posaçme për blerje nga 9-12 e mëngjesit për ata mbi 65 vjeç do të qëndrojë gjithashtu në fuqi.
Në institucionet e arsimit të lartë, të njëjtat rregulla do të zbatohen si në Hungarinë rurale. Vizitat në konviktet e institucioneve të arsimit të lartë do të vijojnë të jenë të ndaluara.
