Mjeku kardiolog shqiptar në Berlin Fahri Beqa thotë se nuk duhet të jemi euforik pas lajmit të mirë të një dite më parë për vaksinën 90% efektive të Pfizer dhe BioNtech. Ai thotë se masat duhen ende të zbatohen me rigorozitet dhe duhet të jemi me këmbë në tokë.
“Deri më tani për shkak të përmasës që ka pandemia dhe pamundësisë për ta mjekuar atë për ta futur në kontroll ky lajm dje ka qenë tepër i rëndësishëm. Është vetëm lajmi i parë i mirë që vjen nga fusha e imunizimit për shkak se ju e dini që ka nga OBSH që kanë informuar që janë dhe 10 vaksina të tjera në fazën e tretë pranë përfundimit dhe kjo ka qenë vetëm vaksina e parë e bashkëpunimit të dy kompanive dhe është shumë lajm i mirë që imunizimi është 90% mirëpo dhe kjo shkallë e 10% te ata që nuk ka dhënë efekt vaksina mbetet ende duke punuar në mënyrë që të kemi një mbrojtje sa më të mirë dhe një imunizim sa më të shpejtë të grupeve të rrezikuara. Sasia e cila do të jetë në gjendje të prodhohet nga kapacitett që ka Pfizer dhe BioNTech është diku 50 milionë doza për këtë vit. Ne e dimë që për të imunizuar saktë duhen dy doza. Nuk duhet të tregojmë eufori duhet të jemi të rezervuar, të mbesim me këmbë në tokë dhe të shohim realitetin me sy dhe ajo është që ne duhet ende të intregrohemi, të zbatojmë masat e parandalimit dhe në momentin që të kemi një licencim dhe një klasim në treg një vaksinë do të kemi një lehtësim të procedurave dhe të punës të të gjitha institucioneve për të zbutur këtë pandemi dhe për ta futur prapë në kontroll”, thotë Beqa në një intervistë për A2CNN.
Megjithatë ky lajm dha sinjale pozitive për njerëzit, por sa kohë do të duhet deri në licencim e shpërndarje të tij. Beqa thotë se për momentin është shumë e rëndësishme të respektohen masat dhe pse njerëzit janë lodhur nga kjo situatë.
“Unë e kuptoj që njerëzit në përgjithësi, si në Gjermani, në Kosovë e në Shqipëri janë lodhur nga kjo situatë. Për shkak se nuk janë vetëm pasojat mjekësore të pandemisë, po dhe pasojat e tjera ekonomike, financiare, varfëria, depresioni e të gjitha. Ne duhet ta dimë që kemi një sëmundje e cila është duke shkaktuar probleme në të gjithë botën dhe duhet të jemi të durueshëm, dhe të tregohemi në nivele më të lartë të detyrës në mënyrë që të kryejmë të gjitha ato që janë akute për momentin që do të thotë shpëtimi i jetëve të njerëzve. Këtu duhet të drejtohet e gjithë energjia. Mirëpo ju e keni vërejtur në Gjermani që ka një rezistencë ndaj masave të parandalimit. Para 2-3 javësh kemi pasur në Lajpcig ku janë mbledhur mbi 20 mijë qytetarë duke protestuar kundër masave në qendër të qytetit dhe kjo është ajo që nuk duhet ndoshta në të ardhmen të shihet në mënyrë siç është parë deri sot, sepse dhe njerëzit kanë të drejtë për të demonstruar, por e drejta për jetë është shumë më e rëndësishme se e drejta e demonstrimit. E kaq, të rrezikohet jeta e një numri të qytetarëve nga një numër njerëzish të cilët janë duke kaluar lehtë sëmundjen, pa simptoma ose me simptoma të lehta dhe nuk janë duke e marrë seriozisht. Ndërsa nga ana tjetër sot kemi arritur një rekord të ri të të sëmurëve që janë në repart intensiv në Gjermani që është rekord duke marrë parasysh dhe muajin mars e prill. Domethënë situata është në Gjermani më keq se sa ka qenë në muajt mars e prill sa i përket trajtimit të personave me sëmundje të rëndë COVID-19 që janë shtruar në repartin intensiv. Për këtë arsye parandalimi na mbetet një çështje që duhet ta marrim shumë seriozisht dhe masat kryesore të respektohen. Nga ana tjetër është duke u bërë dhe plani konkret i vaksinimit, sepse ne e presim që në muajt e parë të 2021 të ketë një prodhim masiv të dozave të vaksinës dhe për këtë arsye Gjermania tani ka krijuar planin konkret të vaksinimit janë krijuar qendrat e vaksinimit është siguruar mënyra e transportimit. Për këtë arsye se kjo vaksinë duhet të qëndrojë në temperaturë minus 70 gradë, për të qenë efektive. Për këtë arsye ne duhet të jemi të kujdesshëm, duhet të mbesim në realitetin që kemi dhe ky është për momentin, që situata nuk është në kontroll”, thotë ai.
Kardiologu shqiptar në Berlin thotë se gjendja në Gjermani është përkeqësuar në dy aspekte si në numrin e rasteve të reja ditore dhe në repartet intensive ku puna është më e ngarkuar.
“Është më e perkeqësuar në dy aspekte, në aspektin e paraqitjes së rasteve të reja, sepse kemi diku rreth 15-20 mijë raste të reja çdo ditë dhe kemi repartet intensive që tani janë më të ngarkuara se kur kemi qenë në muajt mars e pril. Në të dyja aspektet kemi situatë më të përkeqësuar. Mirëpo tani kemi shumë më shumë informacione për zhvillimin e sëmundjes, e dimë saktësisht se ku duhet të përqëndrohemi në aspektin medicinal dhe nuk jemi duke pasur probleme me shtretërit intensiv, mirëpo jemi duke pasur tani në Gjermani tani probleme me personelin shëndetësor, sidomos me personelin e mesëm shëndetësor, për shkak se një numër i tyre tani janë duke u përballur me sëmundjen, disa janë duke u përballur në karantinë, disa të tjerë janë duke lëvizur nga një vend në tjetrin për të ndihmuar, pastaj kemi dhe pacientë që kanë ardhur nga Çekia, Holanda, Franca po ashtu dhe kjo është ajo që ka rënduar situatën. Mirëpo nuk është situata e pakontrolluar, kemi një kontroll mirëpo që nga dje për shembull të gjitha operacionet e tjera që kanë qenë të planifikuar jemi të detyruar që ti shtyjmë. Duhet të mbetemi të koncentruar mbi pandeminë”, vijon mjeku i njohur.
Beqa thotë se COVID-19 nuk ka pësuar ndonjë ndryshim, është po ai që shkakton sëmundjen, por ajo që ka ndryshuar është numri i rasteve.
“Virusi nuk ka pësuar ndonjë ndryshim është i njëjti që ka shkaktuar sëmundjen. Ajo që ka ndryshuar është kuantiteti i rasteve. Ne jemi duke testuar edhe më shumë është fakt, mirëpo në shfaqjen e numrit të madh të rasteve janë duke ndikuar ato grupe të personave që thashë dhe më herët janë duke kaluar lehtë, ose pa simptoma fare dhe këta tani janë duke sjellë sëmundjen te grupet e rrezikuara. Ne në Gjermani, në Berlin kemi përditë e më shumë të infektuar që vijnë nga mosha të thyera dhe sëmundjet kronike. Dhe tani ka arritur numri i të sëmurëve që ju duhet trajtim intensiv nga 15% në 25% të reparteve intensive. Ajo që ka ndryshuar në aspektin e mjekimit, në aspektin e diagnostifikimit është që ne jemi më shpejt duke hetuar rastet. Dhe e dyta është duke marrë një trajtim adekuat si në mënyrën e parandalimit të embolive mushkërore që janë arsyeja kryesore që na kanë vdekur pacientët në muajin mars dhe prill. Ne kemi menduar se kanë vdekur si pasojë e çrregullimeve polmonare dhe ndryshimet që janë paraqitur në indin mushkuror. Tani e dimë që shumica e pacientëve na kanë vdekur nga emboli mushkurore dhe kjo kohët e fundit është trajtuar më mirë. Për këtë arsye dhe pse kemi pasur më shumë pacientë të shtrirë kemi më shumë të mbijetuar. Në gjermani mund të themi sipas raporteve të fundit, 2 nga 3 pacientë që janë intubuar janë shpëtuar. Më herët ka qenë e kundërta, dy nga tre kanë vdekur. Ne duhet të jemi të vëmendshëm në parandalim derisa të kemi një vaksinë e cila do të aplikohet në masë në të gjitha grupet, sepse vaksina siç e dëgjuat më herët nuk do të jetë e detyrueshme”, vijoi ai.
Lidhur me masat e fundit e marrë në Gjermani për përdorimin e maskës dhe karantinimit, Beqa thotë se maska do të vijojë të mbahet dhe kjo nuk duhet vënë në diskutim, ndërsa ka ndryshuar koha e karantinimit.
“Përdorimi i maskës rekomandohet dhe më tutje dhe kjo as që nuk duhet të diskutohet efekti i saj. Mbajtja e maskës ka treguar një efekt të shkëlqyeshëm në parandalimin e sëmundjes. Dhe nëse është bërë bartja e sëmundjes nga personi në person sepse kanë mbajtur maskën, atëherë sasia e virusit që është futur tek personi ka qenë e vogël dhe nuk ka arritur të shkaktojë sëmundje të rëndë. Ka grupe të caktuara që janë duke e refuzuar këtë, dhe unë e thashë janë ato grupmosha që nuk e zhvillojnë sëmundjen e rendë COVID-19. Sa i përket karantinimit kjo tani është detajizuar. Personat që janë të kyçur në sistmein shëndetësor kanë një periudhë karantinimi më të shkurtër, dhe disa kanë të ashtuquajtur gjysmë karantinim. Ata të cilët punojnë nëpër reparte intensive, dhe nëpër repartet COVID dhe nëse janë pozitiv për shkak të mungesës së stafit janë duke ripunuar. Ata shkojnë në shtëpi por nuk dalin të shkojnë nëpër dyqane. Ndërsa përsa i përket grupeve të tjera ata janë të detyruar që të futen në karantinimi për pesë ditë dhe pastaj të testohen dy herë dhe nëse janë negativ largohen nga karantinimi ndërsa të tjerët minimumi 10 ditë”, tha ai për A2 CNN.
