Në Ambasadën e Republikës së Shqipërisë në Greqi, vijon me ritme të përshpejtuara puna për pajisjen e qytetarëve me mjetet e identifikimit.
Në një njoftim të radhës Ambasada e Republikës së Shqipërisë në Athinë njofton se të gjitha aplikimet për pasaportë dhe kartë identiteti të kryera në portalin www.e-albania.al, për Zyrën Konsullore Athinë, kanë marrë një datë takimi, afati i të cilit është deri në datën 27 tetor 2020.
Një nga problemet që ngre zyra konsullore është neglizhenca e qytetarëve për të qenë më vigjilent me mesazhin elektronik që i dërgohet, ndaj lutet që qytetarët shqiptarë në Greqi të kontrollojnë me kujdes postën elektronike.
Ky informacion u vjen në ndihmë gjithë atyre bashkatdhetarëve të cilët kanë humbur ose mund të humbasin datën e takimit për shkak të aspektit teknik të kësaj procedure.
Ndërsa Konsullata e Përgjithshme e Republikës së Shqipërisë në Selanik, në vijim të përmirësimit të shërbimit ndaj qytetarëve, ka vendosur që për të gjithë shtetasit që kanë probleme me aplikimin online të ofrojë asistencë pa pagesë në sportel. Kjo do të shërbej jo vetëm për t’ju kursyer kohë dhe shpenzime të tepërta, por edhe për të marrë sa më shpejt shërbimin e kërkuar.
Përgjatë këtij muaji Konsullata ka asistuar 98 shtetas me aplikime në sportel si dhe mbi 210 shtetas me regjistrimin në portalin e-Albania.
Kush përfiton nga kjo asistencë?
– Të gjithë shtetasit mbi 60 vjeç;
– Të gjithë shtetasit me probleme shëndetësore;
– Të gjithë shtetasit që vijnë nga ishulli dhe nuk kanë mundur të aplikojnë online, vërtetuar kjo në emailet që kanë nisur ose në faqen e “e-Albania” në rastet e bllokimit.
Ditën që do të paraqiteni në Konsullatë duhet të kenë me vete domosdoshmërisht;
- Pasaportën që ju ka skaduar;
- Kartën ID që ju ka skaduar;
- Pagesën në shumën 142 euro në Bankën Ethniki
- Pagesa prej 142 euro është vetëm për ata shtetas që janë mbi 16 vjeç.
- Për shtetasit nën 16 vjeç pagesa është 130 euro.
