Anila Hyka dhe Brikena Muharremi, dy përfaqësuese të shqiptarëve që jetojnë jashtë vendit, anëtare të Këshillit Koordinues të Diasporës Shqiptare, në një intervistë dhënë për ABC News kanë folur mbi votën e e shqiptarëve që jetojnë jashtë vendit, e premtuar nga Qeveria që në vitin 2017.
Ato thonë se pengesa është vetëm politike.
“Ndoshta fjala tradhtuar është pak e rëndë por është mosmbajtje fjale ose më saktë neglizhim. Së pari është çështje e vullnetit të politikës shqiptare. Duhet të jetë në prioritetin të tyrezës por dhe të partive politike vota e shqiptarëve jashtë vendit”, – u shpreh Anila Hyka, përfaqësuese e shqiptarëve që jetojnë në Francë por jo vetëm.
Ndërsa Brikena Muharremi, përfaqëson interesat e shqiptarëve që jetojnë në Britaninë e Madhe. Edhe ajo, u shpreh se për zgjidhjen e kësaj situate mungon vullneti politik.
“Arsyet teknike janë shumë lehtë të tejkalueshme por mendoj që ka munguar një vullnet politikë që kjo çështje të përshpejtohet. Megjithatë, e drejta e votës mendoj se do të arrihet, është çështje kohe”,- pohon ajo.
Vota e emigrantëve është një e drejtë e parashikuar në Kushtetutë.
“Kemi të bëjmë me një të drejtë e cila garantohet me Kushtetutë por Kodi Zgjedhor i tanishëm e mohon atë”, ka thënë Muharremi.
“E vetmja formë e çdo shtetasi shqiptar për t’iu dëgjuar zëri është përmes votës. Në rast se ne kjo na mohoet nuk ka forma të drejta, mund të diskutosh, mund të bësh kërkesa asgjë nuk dëgjohet”, shprehet Hyka.
Përpos propozimeve në Komisionin për Reformën Zgjedhore, Këshilli ka ndërmarrë një peticion i cili është firmosur deri më tani nga mbi 2500 shqiptarë.
“Ne ia kemi dorëzuar peticionin institucioneve, ia kemi dorëzuar Presidentit, Kryeministrit, Kryetarit të Parlamentit, zotit Basha, zonjës Kryemadhi, Komisionit për Reformën Zgjedhore. Deri më tani nuk kemi reagim zyrtar”, u shpreh zonja Muharremi.
Peticioni parashtron dy kërkesa:
“E para është e drejta e votës që shtetasve shqiptarë që jetojnë jashtë që tu jepet mundësia që të drejtën Kushtetuese të zbatohet dhe të votojnë nga vendet ku jetojnë dhe kërkesa e dytë është mundësia që të njohin kandidatët për këtë votojë, pra lista të hapura”,- u shpreh Hyka.
E pyetur mbi rëndësinë e votës së shqiptarëve Muharremi u shpreh:
“Me inkuadrimin e votës së Diasporës do të rritej legjitimiteti i institucioneve të shtetit shqiptarë, pra do ishte një demokraci më e avancuar”,- u shpreh ajo.
“Shtetasi shqiptarë që është jashtë, që është i integruar qoftë dhe një student dhe çdo njëri që ka një distancë që nuk ka varësi ekonomike jetike e ka më të lehtë të bëjë përzgjedhjen por edhe partitë politike do të mendohen mirë kur do i zgjedhin përfaqësuesit e tyre”, ka thënë Hyka.
