Shqiptarja Dr. Julia Daragjati prej vitesh jeton dhe punon në Itali. Daragjati njëkohësisht është kërkuese shkencore pranë Departamentit të Shëndetit të Gruas dhe Fëmijës, në Universitetin e Padovas- Itali, dhe pjesë e platformës virtuale në shqip “Heda”. Misioni i kësaj të fundit është shpërndarja e informacioneve të sigurta sa i përket promovimit të shëndetit të mirë e të sigurtë.

Farmacistja shqiptare Dr. Julia Daragjati, së fundmi ka prezantuar studimin e saj në lidhje me “Mjekësinë gjinore dhe COVID-19”.

Ajo pohon se një virus i tillë shfaqet njësoj tek të dyja gjinitë. Mirëpo, nuk mohon faktin se ashpërsia e tij është shumë herë më e madhe tek meshkujt.

“Meqë studioj në Padova dhe merremi me studime në mjekësinë gjinore ka qenë një ndër temat më të prekura dhe më të studiuara mund të them se femrat dhe meshkujt janë të prekur sipas një fotografie të të gjitha këtyre studimeve që edhe ju përmendët janë të prekur njëlloj por është vënë re që ashpërsia shprehet më shumë në popullsinë mashkullore. Unë po e them si popullsi mashkullore se i përket të gjitha grupmoshave, që nga fëmijët deri tek të moshuarit. Meqënëse edhe ashpërsia është më e madhe tek popullsia mashkullore, kemi vënë re që faktor rreziku është të qenurit mashkull,”- tregon farmacistja shqiptare.

E pyetur në lidhje me situatën në Itali,ajo përgjigjet: ”Nuk mund të themi se ka rënë fuqia e virusit, por duke qenë se ne kemi aplikuar distancën sociale dhe janë marrë masa të shumta, qytetarët janë ndërgjegjësuar më shumë kundër këtij virusi prandaj ka edhe rënie të rasteve”.

Ajo apelon qytetarët të kenë kujdes dhe të respektojnë masat e kërkuara pasi virusi është ende mes nesh.