Në të gjithë botën numërohen gjithsej 10 instruktorë policie të nivelit të 8 në “Commando Krav Maga” të Izraelit. Njëri prej tyre është shqiptari i Kosovës, Uliks Gjonaj.
Me origjinë nga komuna e Gjakovës, Gjonaj që prej vitit 2013 përpos titullit si “SWAT instructor”, tashmë është edhe instruktor i instruktorëve të policisë.
Amerika, Zvicra apo Izraeli shpesh e kanë thirrur për të trajnuar punonjësit e policisë.
Ai stërvit skuadrën policore më të fuqishme në botë siç është FBI apo SWAT-i amerikan (special weapons and tactics).
Historia e Uliksit nuk është e zakontë. Ai hoqi dorë nga mjekësia për tu bërë pjesë e policisë.
“Ishte qëllimi për nga mjekësia pastaj emigrova në Shtetet e Bashkuara të Amerikës dhe aty ndryshoi. Nga mjekësia kalova në fushën e sigurisë. Të gjithë ma bëjnë këtë pyetje se si është e mundur por ja që është e mundur. Mjekësia është një sistem human por edhe trajnimet që bëj, që ushtroj policinë dhe njësitë elite apo ushtrinë, i trajnoj që ata ta mbrojnë dikë dhe të mbrojnë vetveten. Kjo është një profesion posaçërisht human, kështu që nuk kam dalë shumë prej bonareve. Kam qëndruar më tepër tek humanizmi”,- shprehet Gjonaj në një intervistë për Albuk. tv
Nëse të gjithë shqiptarët ëndërrojnë të kenë një pasaportë evropiane apo të Amerikane, duket se dëshira e Uliksit është shumë ndryshe nga ajo e të rinjve shqiptarë. Ai kërkon të jetë qytetar i Shqipërisë vetëm për një arsye, që Shqipëria të njihet në organet e policisë botërore si një vend që prodhon njerëz elitarë.
