Shqiptari Mervin Skuqej jeton në Bergamo të Italisë një prej vendeve më të prekura nga pandemia e shkaktuar nga COVID-19.
Prej vitesh ai punon në këtë qytet si bukëpjekës. Në këto ditë të vështira që po kalon vendi, ai ka vendosur që t’i vijë në ndihmë komunitetit duke shpërndarë bukë falas për mosha t e treta.
Gjatë pandemisë, ai nuk e ka mbyllur aktivitetin e por ka preferuar ta mbajë hapur, duke prodhuar bukë çdo ditë.
Jo vetëm kaq, ai shprehet se në bashkëpunim me stafin e tij ka dalë vullnetar për t’ju dërguar banorëve pazarin dhe blerjet nëpër shtëpi, me dëshirën që të qëndrojnë sa më shumë brenda dhe të mos dalin.
“Gjatë gjithë periudhës së pandemisë – thotë Mervin – ne kemi qenë gjithmonë të hapur dhe ende vazhdojmë të bëjmë dërgesa në shtëpi. Në muajin prill, ne menduam për këtë iniciativë dhe vendosëm të ndihmonim veçanërisht moshat e treta që të shmangnin daljen nga shtëpia, për të mos u rrezikuar nga infektimi me Covid-19. Ishte një gjest simbolik që u ndjeva i detyruar të bëja ndaj qytetarëve.”- thotë ai.
Më dukej normale të mendoja për një iniciativë të tillë, sepse duke qenë këtu, gjithmonë jam ndihmuar nga të gjithë dhe kam dashur të falënderoj bashkëqytetarët e mi në këtë mënyrë “.
Më tej, Mervin tregon vështirësitë me të cilat u ndesh që nga viti 2006, kohë kur vendosi të transferohej në Itali.
“Filimisht kam punuar një vit në Treviso si murator. Më pas mbërrita në Bergamo në vitin 2007. Kam punuar pesë vite si punonjës në këtë furrë. Pasi, ish-pronari, Mario Bellini, doli në pension në vitin 2012, biznesin e mora unë përsipër. Ai më mësoi tregtinë, më dha një shtysë të madhe kur arrita në qytet”,- vijon më tej Mervin.
“Pasi nisa iniciativën për të ndihmuar të moshuarit, shumë klientë erdhën për të më falënderuar. Ishte një kënaqësi vërtetë e madhe për mua. Shpresoj që ky gjest i vogël të ketë qenë i dobishëm dhe ngushëllues për këtë periudhë të trishtueshme për qytetin tonë”.
*Ndalohet kopjimi, riprodhimi dhe publikimi i intervistës pa cituar burimin “Diaspora Shqiptare”.
