Shërbimet konsullore të ambasadave në çdo vend ishin pezulluar përkohësisht për shkak të pandemisë së Covid-19. Pas afro dy muajsh, shumë prej tyre, falë masave lehtësuese të marra nga shtetet përkatëse, kanë rifilluar punën.
Ambasada e Shqipërisë në Romë, Itali, ka komunikuar se shërbimet e saj konsullore do të nisin nga data 3 qershor. Lajmi është bërë i ditur nëpërmjet një postimi në faqen zyrtare në Facebook. Për shkak të pandemisë Covid-19, takimet e përcaktuara më 11 mars-30 qershor 2020 do të zhvendosen në të tjera data.
Qytetarët e interesuar do të njoftohen në adresën e-mail nga ku kanë aplikuar për shërbimet që kërkojnë paraqitje në sportel. Ambasada sqaron se në të njëjtën mënyrë do të njoftohen për datën e takimit edhe qytetarët që kanë kryer kërkesa të reja në portalin e saj.
Ambasada e Shqipërisë në Romë bën thirrje që qytetarët të respektojnë rregullat e parashikuara për mbrojtjen ndaj koronavirusit, që nga ruajta e distancës sociale dhe mbajtja e maskës, ashtu edhe matja e temperaturës, në hyrje për në Zyrën e Shërbimit Konsullor.