Afrim Halimi, radiolog në spitalin “Al Razi” në Kuvajt, tregon për situatën e krijuar nga Covid-19 dhe përgatitjet e sistemit shëndetësor për përballimin e virusit.
Në një intervistë për televizionin “Dukagjini”, mjeku shqiptar nga Gostivari fillimisht tregon se si paraqitet situata në Kuvajt.
“Në Kuvajt janë diku mbi 40 mijë të infektuar prej të cilëve mbi 30 mijë janë të shëruar. Aktualisht janë 8 mijë persona nën kontroll. Kemi rreth 300 të vdekur por situata është nën kontroll. Kemi qenë në karantinë të plotë tre javorë dhe rënie të kurbës,”- shprehet mjeku.
Numrin e lartë të të infektuarve me Covid-19, mjeku e lidh me faktin e kryerjes së testimeve masive.
“Unë mendoj se numri i madh rezulton nga fakti se është numri i madh i testimeve. Brenda cdo dite bëhen diku afro 3 mijë testime. Duke qenë se është numër i madh i testimeve, nga ky fakt rezulton edhe numri i rasteve të evidentuara,”- tregon ai.
Shumë qytetarë nuk e marrin seriozisht koronavirusin, duke thënë se është thjesht konspiracion. Ai i hedh poshtë këto pretendime teksa bën apel që secili të tregojë vëmendje dhe kujdes maksimal.
“Ende jemi duke luftuar me virusin. Do doja të apeloja të gjithë qytetarët të mos e marrin me neglizhencë pasi virusi ekziston. Në rrjete sociale shoh që qytetarët nuk janë të bindur se Covid ekziston. Ka qytetarë që mendojnë se është konspiracion që nuk është e vërtetë. Virusi ekziston. Do kisha apeluar të gjithë qytetarët që t’ju përmbahen rekomandimeve të organizatave shëndetësore, të mbajnë maska, distancën dhe të dezinfektojnë duart. Dmth sëmundja ende nuk është mundur”- vijon më tej ai.
Mirëpo, Halimi nuk është i vetmi shqiptar që punon në spitalet e Kuvajtit. Ai flet edhe për shumë mjekë të tjerë që janë nga viset shqiptare dhe që janë në vijën e parë të luftës ndaj Covid.
“Në Kuvajt jemi diku mbi 200 shqiptarë nga të gjitha viset, duke marrë parasysh Kosovë, Shqipëri, Maqedoni e Veriut etj. Takohemi nëpërmjet ambasadës së Shqipërisë për shkak se nuk kemi ambasadë të Maqedonisë ose Kosovës. Jeta është mjaft e begatshme,”- pohon mjeku Halimi.
