Komuna e Chieuti (Qefti në arbëresh) në Itali ka marrë titullin “Dera e Pulias” nga Ministria e Zhvillimit Ekonomik, pas kërkesës së kryetarit të saj Diego Iacono.

Sipas tij ky është një hap që do të krijojë hapësira kulturore që tërheqin shumë vizitorë, përmirësojnë cilësinë e jetës së të gjithë qytetarëve. “Kjo përfaqëson për Chieuti një rifillim të vërtetë që do të krijojë përfitime për turizmin lokal, traditat dhe fushën agroushqimore, duke favorizuar sigurisht zhvillimin lokal që për shumë kohë ka qenë i bllokuar dhe në rrezik”, shpjegon kryebashkiaku.

Chieuti shtrihet pothuajse në kufi me Molisen, në një kodër nga ku mund të shihet deti, një panoramë madhështore që nis nga Maiella për të arritur në Gargano. Vend me origjinë shqiptare ku shumë flasin dhe kuptojnë “arbëreshen”, formën e vjetër të gjuhës shqipe.

Shqiptarët siç dihet shkuan atje në vitet 1461-1470, kur Skënderbeu dërgoi një ushtri prej 5 mijë burrash për të ndihmuar Ferdinandin e I të Aragonës në luftën ndaj Giovanni Angio. Popullsia, dhe gjithashtu dhe Chieuti, u bënë pjesë e asaj që në historinë e kolonive shqiptare në Itali quhet si migrimi i tretë. Qyteti karakterizohet nga një qendër historike me shtëpi të ulëta, ndërtesa antike dhe rrugica të ngushta nga ku mund të shihet pamja panoramike e bregdetit.

Një vend i pasur me tradita unike që ruhen prej më shumë se 400 vjetësh, siç është festa e San Giusseppe, e karakterizuar nga bekimi i zjarreve dhe ardhja e qerreve në fshat. Ngjarje që kujton “festën e pranverës” që kremtohet në Shqipëri.

Unikë në llojin e saj dhe festa e San Giorgio, ku bie në sy bekimi tradicional i Alloro, Tarallo dhe Carrese, të njohura në të gjithë botën. Për këtë arsye rajoni i Pulias me një urdhër të pushtetit vendor i ka njohur dhe mbrojtur këto tradita, duke i konsideruar ato si burime kulturore me identitet të fortë historik-kulturor dhe njerëzor të rrënjosura në këto vende, duke mbështetur kështu zhvillimin lokal.

Ekonomia e Chieuti bazohet në turizmin e plazhit madhështor me det të pastër e të pandotur nga shumë njerëz që vijnë në verë nga gjithë Italia dhe e gjithë vbota. Bujqësia është e rëndësishme e favorizuar dhe nga tokat pjellore.

Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.