Në Shqipëri ka mbërritur i ftohti arktik, teksa termometri ka shënuar vlera negative që në orët e para të së shtunës. Në disa zona ka pasur reshje bore gjatë natës duke sjellë dhe vështirësi në qarkullim.

Dibra dhe Korça janë mbuluar nga bora teksa bëhet e ditur se ka duhet të ketë kujdes në rrugët për në zonat turistike si Dardha dhe Voskopoja.

Qarkullimi rekomandohet me zinxhirë në Qafën e Qarrit, rrugën e Dardhes, rrugën Voskop – Voskopoje për mjetet e vogla. Udhëtarët që i zgjedhin këto destinacione për të pushuar duhet ta kenë parasysh.

Ndërkohë që rruga rurale Shtylle-Panarit vijon të mbetet e bllokuar. Ndërsa në zonat malore të Dibrës raportohet për mungesë të energjisë elektrike në disa fshtra. Ndonëse kontraktorët janë në rrugë për pastrim dhe kriposje, rreshjet vazhdojnë në disa zona të shoqëruara edhe me erë.

Reshjet e borës kanë nisur në mesditë  dhe në Shkodër, zonë e cila është ende nën pushtetin e ujit duke e rënduar edhe më gjendjen në zonat e përmbytura. Përveç problemeve me ujin, tani po shtohen problemet me temperaturat e ulta që vështirësojnë situatën, mjaft të rënduar prej mëse 5 javësh. Bashkia e Shkodrës ka raportuar mëngjesin e të shtunës se janë mbi 5 mijë hektarë tokë nën ujë në gjithë qarkun. Po ashtu janë mbi 100 shtëpi në ujë dhe ka vështirësi të mëdha në qarkullim.

Gjithashtu qyteti i Lezhës është zbardhur nga dëbora, gjithashtu dëbora ka rënë edhe në qytetin e Elbasanit, por nuk ka arritur të vendosë shtresë për shkak të reshjeve të shiut.

Autoriteti Rrugor Shqiptar bëri të ditur mëngjesin e sotëm se gjatë natës kanë filluar reshjet e borës në Qarkun e Kukësit, në Qarkun e Dibrës, në Qarkun e Korçës, në Qafë Mali-Fierzë, në akset e Sarisalltikut dhe Steblevës, shoqëruar me temperatura të ulëta.

Kontraktorët kanë bërë shpërnadrjen e kripës dhe pastrimin e të gjitha akseve. Në akset Korçë-Qafë Qarri, Korçë-Dardhë, Voskop-Voskopojë rekomandohet përdorimi i zinxhirëve. Vazhdon puna me mjete borë pastruese. Drejtuesit e mjeteve të tregohen të kujdesshëm, sidomos gjatë natës dhe në orët e para të mëngjesit për shkak të ngricave, të reduktojnë shpejtësinë, të respektojnë sinjalistikën rrugore, të pajisen me goma dimërore dhe zinxhirë.

Edhe në qarkun e Tiranës rekomandohet përdorimi i zinxhirëve në akset Qafë Priskë-Qafë Mollë, Qafë Priskë-Shëngjergj, Trau Dajt-Teleferik. Stuhia e borës ka përfshirë edhe bregdetin.

Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.