Revista e përmuajshme e UNESCO-s, në versionin italisht, “Il Corriere” në numrin e muajit prill të vitit 1974 i ka dedikuar dy artikuj Shqipërisë. Ky ishte një numër me fokus artin dhe arkeologjinë në katër shtete: Shqipëria, Ekuador, Kinë dhe Bullgari.
Dy artikujt dedikuar vendit tonë, titulloheshin i “L’Albania cerca L’Illiria” (Shqipëria kërkon Ilirinë) dhe artikulli tjetër dedikuar piktorit të njohur Onufri “Onufri, pittore Albanese” (Onufri, piktor shqiptar).
Revista “Il Corriere” është revista kryesore e botuar nga “Organizata e Kombeve të Bashkuara për Arsim, Shkencë dhe Kulturë (UNESCO)” në disa gjuhë. Ajo ka lexueshmërinë më të madhe të të gjitha revistave të botuara nga Kombet e Bashkuara dhe institucionet e saj të specializuara.
Fillesat e revistës datojnë në vitin 1948. Revista ka ndryshuar shumë gjatë viteve, si në përmbajtje ashtu edhe në formë. Por ajo ndjek misionin e saj origjinal: të promovojë idealet e UNESCO-s, të mbajë një platformë për dialog midis kulturave dhe të sigurojë një forum për debat ndërkombëtar.
Korrieri i shtypur i UNESCO-s përfshin çështjet e shkrim-leximit, të drejtave të njeriut, mjedisit, kulturës, shkencës dhe artit. Nga marsi i vitit 2006 kjo revistë mund të lexohet online në formatin PDF në gjashtë gjuhë të Organizatës (anglisht, frëngjisht, spanjisht, arabisht, rusisht dhe në gjuhën kineze).
Fotot e revistës në versionin italisht “Il Corriere” kortezi e Florian Fusha
