Mjeku shqiptar në Milano të Italisë, Albert Troci, në një intervistë tregon për situatën në prag të festave të fundvitit në vendin fqinj.

Ai foli dhe për masat e marra nga autoritetet për të ndaluar përhapjen e virusit. “Italia ka zgjedhur ti ndajë këto festa në fasha. Në ditën e Krishtlindjes Italia ishte tërësisht e mbyllur. Pritet dhe në festën e Vitit të Ri të mbyllet sërish për të evituar grumbullimet dhe rritjen e numrit të të infektuarve”, – tha mjeku shqiptar.

Përsa i përket procesit të vaksinimit në vendet e BE-së ai tha se duhet të kemi pak durim derisa të arrihet imunizimi i turmes përmes saj. “Një problem tjetër madhor është arritja e vakinës në shumë vende, sepse është pandemi e virusi nuk njeh kufij”, tha ai.

Ndërkohë për mutacionin që ka pësuar virusi dhe që u detektua në Britaninë e Madhe, mjeku Troci thotë se është më infektues ndaj fëmijëve.

“Ndërkohë kemi dhe lajmet e varianteve, ajo që pati më shumë problem ishte varianti britanik se kishte një mutacion specifik në proteinën spike, çelësi që përdor virusi për tu futur në qelizat tona dhe gjëja kryesore që u pa te kjo ishte që infektonte pak më shumë fëmijët. Siç e dini fëmijët kanë qënë pak më të mbrojtur sepse kanë atë receptorin e qelizave tona që është ACE2, më pak i shprehur në qelizat e fëmijëve. Mund të them se u detektua në Britani pasi është ndër vendet që kanë laboratorin më të fuqishëm për sekuencimin gjenetik”, tha ai.