Filmi shqiptar “Zgjoi” me regji të Blerta Bashollit do të jetë konkurrentë në “Sundance Film Festival” në kategorinë e filmit dramatik për kinemanë botërore.
Siç dhe thuhet në faqen zyrtare të Sundance, në garë me “Zgjoi” janë filma nga Argjentina, SHBA, India, Malta, Kina, Brazili, Suedia dhe Polonia.
Filmi ka për regjisore Blerta Bashollin dhe është një bashkëpunim nga Kosova, Zvicra, Maqedonia dhe Shqipëria. Producentë të filmit janë Yll Uka, Valon Bajgora dhe Agon Uka.
“Zgjoi” rrëfen historinë e Fahrijes, bashkëshorti i të cilës është zhdukur që nga lufta në Kosovë. Ajo krijon një biznes të vogël për t’u siguruar jetesën fëmijëve të saj, por ndërkohë lufton ndaj një shoqërie patriarkale që nuk e mbështet. Fahrija përballet me një vendim të rëndësishëm: të presë kthimin e bashkëshortit, ose të vazhdoj të këmbëngulë. Aktorë të filmit janë Yllka Gashi, Çun Lajçi, Aurita Agushi, Kumrije Hoxha, Adriana Matoshi dhe Kaona Sylejmani.
Festivali është vendosur të mbahet vitin e ardhshëm prej 28 janarit deri më 3 shkurt. Që prej vitit 1978 ai është bërë një festival jetor i organizuar nga instutit Sundance, në Utah të SHBA-ve dhe konsiderohet si festivali më i madh i pavarur i filmit në Shtetet e Bashkuara.
