Doktor Ismet Lukolic është mjek gastroenterolog në New York dhe punon në Qendrën Universitare në New York.
Në një intervistë televzive ai tregon se tashmë me shtimin e rasteve me grip sezonal do të jetë shumë e vështirë të dallohet gripi sezonal nga COVID-19. “Ka shumë mundësi që tani personat mund të infektohen njëkohësisht edhe nga COVID-19 dhe nga gripi dhe është shumë e vështirë që të gjendet diagnoza e duhur, sepse janë të ndryshme si diagnoza. Gripi sezonal gjithashtu është rrezik dhe ka marrë shumë jetë njerëzish ndër vite. Për këtë arsye duhet treguar shumë kujdes dhe të komunikohet gjithmonë me mjekun për të marrë diagnozën e duhur të medikamenteve. Unë rekomandoj të merret vaksina kundër gripit.”
Ndër shenjat e COVID-19 doktor Lukoliq përmend disa, përfshirë edhe diarre. “Ethe, kollë, lodhje, diarre, frymëmarrje të rënduar, humbje të shijes. Gjithashtu dhe simptoma të veçanta për gastroenterologjinë, si diarreja, e cila është një ndër simptomat që në moment që shoqërohet me temperaturë ose simptoma të tjerë ka nevojë për trajtim mjekësorë, në të kundër kur ka vetëm diarre unë do sugjeroja të përdoren medikante popullore të tipit bukë e thekur, banane, kos etj., që ndihmojnë në mbledhjen e barkut, në rast se personi nuk ka temperaturë. Edhe në rastin e sistemit tretës më të rrezikuar në moment që infektohen janë moshat e mëdha dhe personat me sëmundje bashkëshoqëruese”.
I pyetur për marrjen e probiotikëve farmaceutikë, Doktor Ismet Lukoliq thekson se është shumë më mirë kur probiotikën i marrim nëpërmjet ushqimit.
“Probiotikët janë të mirë, por nuk ka hulumtime që janë efikas për Covid-19, për mendimin tim është më mirë të merren nëpërmjet ushqimeve të përditshme.”
Sipas tij këshillat më të mira janë të respektohen këshillat e Ministrisë së Shëndetësisë, të respektohet vendosja e maskës, distanca, larja e duarve herë pas here, sepse ka shumë rëndësi. “Një këshillë për të gjithë bashkatdhetarët, është që nëse nuk kanë arsye urgjente për tu kthyer në vendlidje, të mos e bëjnë dhe të presin që kjo situatë të kalojë”.
