Profesori i Ekonomisë, Klajdi Bregu në Universitetin e Indianës në SHBA thotë se pandemia goditi rëndë ekonominë në gjithë botën, sipas të cilit në Amerikë një pjesë e restoranteve që u mbyllën vështirë ti rikthehen konkurrencës.

“Para rreth një muaji ishte një parashikim rreth 25% prej tyre (restoranteve), sipas një vlerësimi rreth një muaj më parë se nuk do të hapen më, pra një në katër restorante të vogla dhe është numër shumë i madh. Të dhashë një parashikim sepse gjendja është shumë e vështirë, megjithatë sipas grafikëve pak a shumë kanë pësuar rënie të mëdha shumë nga këto biznese dhe pse disa kanë nisur të rekuperohen”, u shpreh ai në “Opinion”.

Kompanitë që kanë pësuar rritje janë Zoom, Skype dhe Delivery. “Ajo që do të doja të theksoja unë se shohim rritje të shpejtë dhe rënie të ngadaltë, përdorimi i tyre do të mbetet aty, nuk do të kthehemi përsëri aty ku ishim, do kemi ristrukturim të fortë të ekonomisë të kësaj periudhe, këtu në Amerikë po besoj dhe në Shqipëri me vetëpunësimin e njerëzve”, vijoi Bregu.

Përsa i përket parashikimit për Shqipërinë, Bregu thotë se vendi u godit nga turizmi në radhë të parë por dhe rënia e remitancave.

“Sipas një kërkimi të Bankës Botërore remitancat bie deri në 27% por remitancat janë rreth 10% e PBB. Nëse kemi rënie 27% është rënie e madhe. Po ashtu eksportet pritet të bien nën 30% dh kjo do krijojë probleme të mëdha për ata që prodhojnë për të shitur jashtë”, tha ai.