Beso Buranaj është një nga shqiptarët e suksesshëm që jeton në SHBA. Ai është diplomuar për inxhinieri kimike dhe nafte dhe aktualisht jeton në Houston.
Besmiri ka punuar në impiante bërthamore, ato biofuels ndërsa aktualisht punon si inxhinier nafte në ‘Baker Hughes” në Teksas.
Duke folur për “Boeing 104.6” në Radio Travel Beso thotë se është marrë me shumë gjëra të fushës së energjitikës. “Ky ka qenë qëllim im kryesor po si gjithmonë gjithçka varet nga energjia, dalë nga dalë u futa në zanatin inxhinier nafte si im atë dhe shumica e shqiptarëve të tjerë që janë këtu në Houston”, tha ai.
Beso thotë se tashmë shumë shqiptarë po lëvizin drejt Houstonit dhe për të ka disa arsye.
“Unë them ka një lloj arsyeje pse ka pas kaq shumë shqiptarë që këto vitet e fundit kanë filluar të lëvizin në Teksas, nga Nju Jork, Detroit, Kaliforni dhe besoj se arsyeja më e madhe është se ke më shumë mundësi se sa në disa vende të tjera. Sidomos varet sipas zanatit. Teksas është shumë i madh dhe mund të flas dhe për Houston që është më e madhe se Nju Jork, por jo aq e dendur. Nuk është e njëjta kulturë siç jemi mësuar ne në Europë. Ne Çikago apo të tjerë si europianë që jemi mund të përshtatemi pak më lehtë. Po Houston është ndryshe. Taksat janë më të lira”, rrëfen ai për Houston që njihet si zonë që e ka prioritet naftën.
Për inxhinierin e naftës me origjinë nga Fieri është vështirë të thuhet se cilat janë burimet e të ardhmes, pasi arsyet janë të ndryshme. Kompanitë tha ai kanë nisur të investojnë në lloje të ndryshme energjisë dhe 2020 ka krijuar atë shkëputjen nga tradicionalja të kësaj industrie.
Beso ka tre projekte për mirëmbajtjen e rezervave të naftës në Shqipëri, tërmetet për shkak të sizmologjisë dhe “Energy Security of natural resources”. Por a ka resurse natyrore Shqipëria?
“Unë them se po, çdo vend aq i vogël ka resurse që mund të mbijetojë apo të mirëmbajë veten e saj. Po Shqipëria nuk është vetëm e sustinable, po një Energy Power House në Balakan. Nuk është vetëm politika problem po burokracia, infrastruktura. Kur them infrastruktura, për shembull, po pate një ekip futbolli mund të kesh portier e sulmues po nuk pate tetë lojtarë të mirë nuk mund të kesh sukses. Duhet të kesh dhe rezervat e afta. Ky është një problem që qëndron në Shqipëri, nuk është se ke shkollimin e duhur për të marrë njerëzit e duhur. Po të sjellësh njerëz nga jashtë si TAP, investimet nuk do të jenë ekonomike. Kjo është në përgjithësi. Unë bëra një studim me AKBN dhe ideja ishte të shihnim rezervat në Shqipëri dhe mund të themi që rezervat më të mëdha që janë në Shqipëri, në Europë, është e vërtetë janë në Patos Marinzë, pa përfshirë Rusinë se nuk merret si pjesë e Europës dhe pa përfshirë Britaninë e Madhe. Problemi qëndron se është naftë shumë e rëndë, dhe të kesh naftë të rëndë duhet të kesh rafineri të afta. Ne kemi pasur tre, ndoshta dy tani, problemi qëndron se nuk e kemi infrastrukturën e duhur. E pabesueshme sa e shtrenjtë është nafta në Shqipëri”, tha ai.
Beso Buranaj numëron mbi 20 shkrime dhe katër patenta studimore, ndërsa është dhe anëtar i shoqatës “Albanian Roots” në SHBA.
