Konsullata e Përgjithshme e Shqipërisë në Selanik njofton të gjithë shtetasit shqiptar në Greqi se nga nesër i gjithë vendi do të nisë karantinën e dytë.
Njoftimin e bëri të ditur vetë Kryeministri grek, Kyriakos Mitsotakis më 5 nëntor, i cili shpalli për herë të dytë karantinë në mbarë vendin për shkak të rritjes së shpejtë në numrin e rasteve të koronavirusit të ri (COVID-19). Mitsotakis njoftoi se karantina e përgjithshme do të fillojë në orën 06:00 këtë të shtunë dhe do zgjasë deri më 30 nëntor.
Konsullata rikujton qytetarët se mund të dalin vetëm për këto arsye:
- Për arsye shëndetësore;
- Për blerje dhe furnizimet e domosdoshme të përditshme;
- Veprime bankare të domosdoshme apo takime urgjente për shërbimet publike;
- Për të ndihmuar njerëzit në nevojë, shoqërimin e të moshuarve apo fëmijët në shkollë (me vërtetim nga shkolla);
- Pjesëmarrje në një ceremoni funerale;
- Lëvizja afër banesës suaj për ushtrime fizike apo kujdesi për kafshët shtëpiake;
- Lëvizja nga shtëpia në punë, kur puna online është e pamundur.
Nëse ju duhet të dilni nga banesa për një nga arsyet e mësipërme, ju duhet të dërgoni një sms në numrin 13033 para se të dilni.
Lëvizjet për në punë janë të lejuara vetëm me një vërtetim të lëshuar nga punëdhënësi juaj.
Konsullata e Përgjithshme e Republikës së Shqipërisë në Selanik do të ofrojë vetëm shërbime për raste emergjence.