Në një intervistë për televizionin Tribuna në fillim të muajit shtator zëvëndësministri për Europën dhe Punët e jashtme, Agron Tare premtoi se procedurat për marrjen e mjeteve identifikuese do të përshpejtohen. Ai tha se brenda muajit tetor çdo pashaport do të merret 15 ditë pas aplikimit në ambasadë.
Tashmë ka kaluar një muaj dhe Ambasada e Republikës së Shqipërisë në Greqi ka publikuar njoftimin ku thuhet se tashmë çdo qytetarë do të marr pasaportën 15 ditë pas aplikimit.
“Siç ju premtuam, tashmë është realitet caktimi i datës së takimit për 5 ditë nga momenti i aplikimit për pasaportë dhe kartë identiteti në portalin e-albania. Nga dita e paraqitjes pranë Ambasadës për kryerjen e procedurës, brenda 15 ditësh, ju mund të tërhiqni dokumentet tuaja biometrikë ose duke u paraqitur personalisht në sportelet e Zyrës së Shpërndarjes ose nëpërmjet shërbimit postar” thuhet në njoftimin zyrtar të Ambasadës.
Gjithashtu qytetarët janë të lutur t’i kushtojnë vëmendje postës elektronike, pasi mesazhi i takimit vjen brenda 24 orësh dhe data e takimit brenda 5 ditësh.
