Njëra nga prezantueset e MTV Video Music Awards 2020 do të jetë edhe këngëtarja e njohur shqiptare Bebe Rexha.
Lajmi e ka bërë të ditur vetë 30-vjeçarja me anë të një postimi në “Instagram”.
“MTV Video Music Awards 2020” do të mbahet këtë të dielë më 30 gusht, një ceremoni e cila do të transmetohet drejtpërdrejt nëpër vende të ndryshme të Nju Jorkut në orën 20:00.
Grupi korean “BTS” do të shfaqin performancën e tyre të parë televizive të këngës “Dynamite”, ndërsa Lady Gaga dhe Ariana Grande do të shfaqen me “Rain On Me” në skenë për herë të parë në TV që nga publikimi i hitit.
Kujtojmë që këngëtarja me origjinë shqiptare Ava Max konkurron për çmimin “Best push artist”, ndërsa Dua Lipa është e nominuar gjithsej në katër kategori: “Regjia më e mirë”, “Koreografia më e mirë”, “Editimi më i mirë” dhe “Efektet vizuele më të mira”.
Dita e dielë do të japë mundësinë t’i shohim bashkë vajzat shqiptare në një nga eventet më të mëdha të muzikës në botë.
