Komuna e Horës së Arbëreshëve ka njoftuar publikisht hapjen e konkursit të kulinarisë së traditës arbëreshe, të titulluar “CoCu 2020”.

Në tekstin shoqërues të njoftimit shkruhet: “Sa është e vërtetë se ne jemi çfarë hamë? Të provojmë ta zbulojmë këtë duke ndihmuar edhe kërkimet mbi traditat tona të gatimit, nëpërmjet pjesëmarrjes në konkurs”.

Thirrja për konkurs është bërë publike në faqen zyrtare të Komunës së Horës dhe po ashtu është shpërndarë edhe nga kryetari i saj Rosario Petta. Në thelb të këtij konkurimi është të shkruarit e të gjitha recetave të gatimit arbëreshe që u kujtohen pjesëmarrësve nga traditat e tyre familjare.

Organizatorë të këtij aktiviteti janë Shoqata kulturore Qvemi, së bashku me Pro Loco, Ale Onlus, Bashkë, Flet, Gajdhurët, Santa Cristina, San Giorgio e Shën Mëria e Dhitries.

Në terminologjinë kulinareske arbëreshe është e njohur shprehja: “Gjithë ç’lëviz nëpër fushat tona përfundon në tavolinat tona”, gjë që tregon për larminë e madhe të gatimeve të këtij komuniteti të lidhur me tokën e me natyrën.