Këngëtarja shqiptare e lindur dhe rritur në Brooklyn, Shtetet e Bashkuara të Amerikës, Bebe Rexha, ka bërë të ditur se ka shtyrë publikimin e albumit të saj të ri.
Ajo shprehet se është e vetëdijshme që fansat e saj janë të mërzitur pasi nuk ka publikuar këngë të re prej një kohë të gjatë.
Sipas 30 vjeçares arsyeja është se ajo dëshiron të pres derisa bota të jetë një vend më i mirë dhe i sigurt.
“E di që fansat e mi janë të frustruar me mua, sepse duan muzikë të re. Por, ju premtoj që unë bashkë me ekipin tim kemi punuar më shumë se kurrë, në realizimin e këngëve të reja. Nuk jemi ndalur duke punuar çdo ditë dhe çdo javë. Mund t’iu them se ky është projekti më i mirë në të cilin kam punuar deri më tani. Mezi pres që ju ti dëgjoni këto këngë. Por, nuk mendojmë se tani është koha e duhur për të publikuar këngë të re. Në momentin që bota do të bëhet një vend më i mirë për të gjithë, do ta publikoj albumin. Thjeshtë po presim momentin e duhur. Ju premtoj se ia vlen të prisni për këtë këngë,” ka shkruar Rexha në një mesazh të postuar në rrjetet sociale.
