Ermal Vila, eksperti shqiptar në Bankën Botërore në Washington DC, SHBA, ka udhëhequr studimin e sapo publikuar nga Banka Botërore “Building effective, accountable and inclusive institutions in Europe and Central Asia“, mbi sektorin publik dhe mirë-qeverisjen.

Ai është diplomuar në Zhvillim Ndërkombëtar në John Hopkins University dhe prej më shumë se 6 vitesh është ekspert i qeverisjes pranë Bankës Botërore në Washington, DC.

Në një intervistë të dhënë më parë për mediat 32-vjeçari shprehej:

Në Bankën Botërore kam filluar punë që në moshën 24 vjeçare, dhe ka qenë patjetër realizimi i një ëndrre e cila vazhdon dhe bëhet më interesante me kalimin e kohës. Këtu kam filluar menjëherë pas përfundimit të Masterit në Johns Hopkins University në Itali dhe në Washington DC.

Edukimin e lartë e kam kryer në Universitetin Amerikan të Selanikut në Greqi në fushën e Diplomacisë, nga ku fillova studimet Master për Zhvillim dhe Ekonomi Ndërkombëtare. Natyra e studimeve të mia të Masterit ishin në të njëjtën linjë me një organizatë të zhvillimit ndërkombëtar si Banka Botërore, por për shkak të mungesës së eksperiencës së punës m’u desh që për gjatë gjithë vitit të dytë të Masterit të takoja personalisht për intervistë ‘joformale’ menaxher dhe punonjës të institucionit. Ishte mënyra e vetme të prezantoja aftësitë dhe njohuritë në fushën e qeverisjes së mirë, përqëndrim të cilin studiova për dy vjet.

Pas shumë takimesh dhe intervistash, profili im përputhej ekzaktësisht me përshkrimin e një pozicioni në një program të politikave të Dialogut Publik-Privat.

Vila është me origjinë nga Korça dhe është larguar që në moshë të re nga Shqipëria.