Veprat e artistit shqiptar Pajtim Osmanaj janë përzgjedhur për t’u ekspozuar online në qendrën kulturore “Instituti Shqiptar në New York”.
Pajtim Osmanaj ka lindur në vitin 1990 në Istog, Kosovë dhe është diplomuar në Akademinë e Arteve të Kosovës.
Ai është shpërngulur në vitin 2013 drejt Shteteve të Bashkuara të Amerikës, ku edhe po korr sukses. Osmanaj para pak kohësh ka bashkëpunuar edhe me Facebook me programin artistik rezidencial të rrjetit të madh social.
Në fillim kur ai është shpërngulur për në SHBA ka nisur punë në ndërtim, ku edhe ka filluar të mësojë për New York-un.
Në një intervistë ai ishte shprehur:
Fillimi i jetës në Amerikë ka qenë shumë interesant, nuk kam pasur shumë njohuri për New York, për Amerikën në përgjithësi, ishte ndryshim i madh e sidomos nëse vjen prej batallinave të Istogut në Times Square të New York.
“Në fillim më është dashur të gjej punë, për të filluar një jetesë normale. Me u rritë në Kosovë është e vështirë, një eksperiencë jetësore njëkohësisht, jemi rritë në rrethana të ndryshme që besoj mu më kanë bërë më të përgatitur për jetë. Njëra prej këtyre përvojave është kur xhaxhai apo komshiu të kanë thirr me i ndihmuar në ndërtim.
Në ndërtim gjatë kohës së lirë pikturoja në muret e ndërtesës, kryesisht ishte për me eksperimentuar në art dhe materiale të ndryshme që gjendeshin aty. Pas një kohe, pata edhe intervistën në New York Times për punët e mia që i kisha realizuar në fushën e ndërtimit, dhe ky ka qenë momenti pas së cilit jam mundu me u aktivizuar më shumë në fushën e artit në New York. Njëkohësisht ende punoja në ndërtim. Eksperienca në ndërtim ka qenë jo e lehtë, por e mrekullueshme, pata mundësi me eksperimentuar me materiale të ndryshme” është shprehur ai.
