Mjekët shqiptarë në Evropë kanë organizuar në një videokonferencë para pak ditësh, për të hartuar një deklaratë të përbashkët rreth situatës së Covid-19, e cila synon të informojë publikun shqiptar. Ramadan Jashari, kardiokirurg, dhe Dr. Refet Nura në Suedi, kanë shpjeguar për emisionin “Dita Jonë” mbi situatën e koronavirusit dhe rrezikun e mbylljes së kufijve.
“Lëvizjet e javëve të fundit të brendshme brenda Unionit Europian kanë qenë shumë pozitive dhe shpresat janë që dalëngadalë po i afrohemi fundit të pandemisë. Mirëpo duke krahasuar evolucionin e pandemisë në disa regjione të tjera, si në Amerikën Veriore, Qendrore dhe Jugore në Ballkan, shumë ekspertë dhe Organizata Botërore e Shëndetësisë në njërën anë dhe Qendra Europiane për Parandalimin e Sëmundjeve në Stokholm, kanë paraqitur një lloj rezerve për deklaratat e mëhershme se jemi në rrugë të mirë për të përfunduar pandeminë dhe tani nuk flitet më për përfundim të pandemisë por flitet për një rënie të numrit të rasteve dhe rreziku i një rikthimi të një vale të re është real dhe ashtu kanë qenë deklaratat e fundit si nga Organizata Botërore e Shëndetësisë ashtu dhe nga Qendra Europiane për Parandalimin e Sëmundjeve” tha Dr Ramadan Jashari.
Ndërsa Dr. Refet Nura shprehet se në ndryshim nga fillimi që testet kryheshin vetëm për njerëzit që kishin simptoma, tanimë ju bëhen edhe atyre që nuk shfaqin komplikacione.
“Masat që janë marrë janë pothuajse të njëjtat që prej fillimit, edhe qasja është e njëjtë. Vetëm se është rritur masivisht testimi edhe i njerëzve të cilët nuk kanë simptoma fare, ndërsa në fillim u rekomandua që të testohen vetëm njerëz që kishin simptoma. Që në fillim Suedia është përcaktuar të mos karantinohet, për shkak se ato parashikonin se nëse do të ketë një mbyllje dhe pastaj kur të ketë një hapje dhe njerëzit do të nisnin të lëviznin hapur edhe mund të nisnin t’i shpërfillnin rekomandimet dhe udhëzimet të cilat janë marrë. Mendoj që kjo frikë ishte mjaft e bazuar për shkak se e kemi rastin konkret në Shqipër, Kosovë e Maqedoni dhe në të gjitha trevat shqiptare. Pas mbylljes është një shpërfillje totale e udhëzimeve dhe rekomandimeve që vijnë nga organet relevante,”- thotë mjeku, ndërsa shton se ka njerëz që e mohojnë ekzistencën e Covid-19.
“I bëjnë shumë dëm popullsisë pasi numri i atyre që i besojnë këtyre konspiracioneve është në rritje. Është shqetësuese pork jo nuk është hera e parë që popullsia goditet nga teori të tilla konsprative,”- vijon më tej Nura.
