Orkestra Haydn po interpreton koncerte të drejtpërdrejta – edhe pse ajo akoma nuk mund të paraqitet në formacionin e plotë. Kjo është arsyeja kryesore përse muzikantët kanë formuar 8 ansamble të dhomës të drejtuara nga solistë, programet muzikore të të cilëve u caktohen tema të tilla si “Na ishte një herë në Amerikë”, “Kthimi për në Vjenë” ose “Nga Salzburgi për në Sicili”.

Koncertet e rifillimit në Tirolin Jugor janë zhvilluar nga 15 deri në 20 qershor në Kështjellën Maretsch në Bolzano.

Repertori i ansambleve të mbledhura për këtë rast ishtë i larmishëm. Pjesë e këtyre iterpretimeve ishte edhe shqiptari Edlir Cano.

Gjatë kohës së pandemisë, profesori dëshmoi në mënyrë të shkëlqyer humanizmin e tij, ku me interpretimet e tij solli kënaqësi italianëve të izoluar.

Violinisti shqiptar me famë ndërkombëtare ka interpretuar pjesën “Balada” të kompozitorit Pjetër Gaci.

Këtë pjesë Edlir Cano e zgjodhi në kuadër të 25-vjetorit të vdekjes së kompozitorit të famshëm shqiptar. “Pjesa më kujton natyrën, ngjyrat dhe kulturën e vendit tim”, shprehet  Edliri.

Ai shprehet se e shikonte si busull orientinmi dhe frymëzimi piktorin italian Raffaello Sanzio. “Muzika klasike është si oksigjeni për shpirtin. Afrimi me të, të lejon të ndihesh më mirë dhe të ndihesh si njeri më i mirë”, thotë Edliri.

Secili muzikant orkestral zgjodhi një pjesë muzikore dhe e interpretoi atë në instrumentin e tij në mënyrë që të sjellë gëzim tek njerëzit në shtëpi gjatë kësaj kohe, t’i argëtojë ata dhe t’u japë atyre guxim!