Një shqiptar në Nju Jork, i cili i bëri ballë koronavirusit, ka humbur jetën tragjikisht nga një aksident. Viktima është Zudi Daci, një veteran i arsimit në Dibër të Madhe, shkrimtar dhe veprimtar.
79-vjeçari po lëvizte mëngjesin e së premtes me biçikletë në rrugën Bulls Head (Staten Island), ku edhe jetonte, kur u godit për vdekje nga një kamionçin e markës Ford 2000.
Daci u transportua në gjendje kritike me autoambulancë drejt Qendrës Mjekësore Universitare Richmond në West Brighton, pasi Departamenti i Policisë në Nju Jork u informua për aksidentin nga një telefonatë në numrin 911.
Sipas gazetës lokale Staten Island Advance, shoferi i kamionçinës, Faustino Garcia, 43 vjeç, nuk lëvizi nga vendi i ngjarjes deri sa erdhi policia dhe i vendosi prangat. Policia mori gjithashtu masa për bllokimin e vendngjarjes, pikërisht aty ku gjendej një biçikletë dhe një palë këpucë, të shpërndara në trotuar.
I biri i tij Fisnik Daci, mes lotëve për humbjen e babait, shkruan në Facebook: Babi im i dashur, i mirë, aq i ndershëm, bujar, fjalë ëmbël e fisnik, iku dhe na la. Ndërsa, mamaja, unë dhe të gjithë ne e ruanim nga ky virus i keq, ai e humbi jetën fatkeqësisht nga një aksident rrugor.
Zydiu la pas vetes bashkëshorten, djalin dhe vajzën Julinda Daci, si dhe nipërit e mbesat.