Gjatë këtyre dy muajve të vështirë të cilët gjithë bota i kaloi duke u përballur me virusin Covid-19, ishin të shumtë mjekët shqiptarë që shërbyen në vijën e parë dhe reparte të tjerë, të qindra spitaleve në mbarë botën.

Shpesh herë historitë e tyre u pasqyruan në media, por shumë të tjera kaluan në hije. I tillë është edhe rasti i bashkëshortëve Sotir dhe Eriola Terova, mjekë shqiptarë në Worcester, Massachusetts, SHBA.

Sotiri dhe Eriola u kanë shërbyer me zell përgjatë dy muajve të gjithë pacientëve të infektuar nga pandemia Covid-19 në qytetin e tyre. Të angazhuar në spitalin “Whittier” mjekët bashkëshortë kanë asistuar dhe kuruar shumë pacientë gjatë kësaj kohe.

Në shenjë nderimi për këtë përkushtim të tyrin ndaj profesionit dhe komunitetit, Kisha Ortodokse Shqiptare (St. Mary’s Albanian Orthodox Church) e qytetit ka zgjedhur një mënyrë mjaft të veçantë për të nderuar dhe falenderuar çiftin Terova për shërbimin e tyre humanitar.

Në bashkëpunim me një restorant të zonës, Kisha u ka ofruar kolegëve të mjekëve në spitalin “Whittier” një vakt tipik europian.