Njerëzit do të udhëtojnë dhe biznesi i turizmit do të rihapet përsëri në një mënyrë graduale, pas goditjes së rëndë nga pandemia e koronavirusit. Megjithatë, kusht mbetet vazhdimi i uljes së kurbës të Covid-19.

Komisioni propozoi sot një sërë rekomandimesh që synojnë heqjen e kufizimeve të udhëtimit dhe kontrollet kufitare në të gjithë Bashkimin Europian.

“Mesazhi ynë është se ne do të kemi sezon turistik këtë verë, qoftë me kufizime apo me masa të sigurisë”, tha komisionari për Ekonomi i BE-së, Paolo Gentiloni, duke iu referuar mundësisë që qytetarët të kalojnë një test shëndetësor paraprak.

Nga e premtja do të ketë kontrolle të rastësishme në vendkalimet kufitare dhe më pas, më 15 qershor, lëvizja e lirë duhet të rifillojë. “Ne duam ta bëjmë jetën e përditshme të njerëzve më të lehtë dhe të hedhim një hap drejt më shumë normalitetit”, tha kancelari Sebastian Kurz.

Pandemia Covid-19 detyroi të gjithë vendet e Bashkimit Europian që të mbyllte përreth dy muaj kufijtë. Por tashmë shtetet kanë filluar t’í rihapin ato. Austria dhe Gjermania ishin vendet e fundit të BE-së që pranuan të hiqnin kufizimet e udhëtimeve.

Udhëtarët në Mbretërinë e Bashkuar tashmë janë paralajmëruar të mos presin pushime ndërkombëtare “luksoze”, me planet për një karantinë 14-ditore për ardhjet në ajër. Por udhëtimi pa karantinë do të jetë i mundur për në Francë dhe Irlandë.