Sekretarja e Brendshme e Mbretërisë së Bashkuar, Priti Patel ka firmosur një marrëveshje me strukturat e Ministrisë së Brendshme në Shqipëri, për dëbimin e “mashtruesve” dhe kriminelëve.

Sipas medias britanike, The Telegraph, gjatë një udhëtimi dy-ditor në Shqipëri, Sekretarja e Brendshme, Patel gjithashtu takoi kryeministrin Edi Rama dhe diskutoi mbi përpjekjet e përbashkëta për të trajtuar krimin e rëndë të organizuar, përfshirë trafikimin e drogës dhe krimin e imigracionit.

Për Patel, kriminelët si dhe ata që nuk arrijnë të marrin azil nga Shqipëria do të përballen me një kthim më të shpejtë në vendin e tyre. Kjo, nën një marrëveshje të re pas Brexit të siguruar nga Priti Patel mbrëmjen e 8 korrikut.

Marrëveshja do ta bëjë më të lehtë deportimin e shkelësve të dënuar.

Kjo do ta bëjë gjithashtu më të thjeshtë lëvizjen e azilkërkuesve shqiptarë që janë refuzuar dhe atyre që i kanë vizat e mbartura.

Marrëveshja u finalizua, sipas The Telegraph, nga Patel gjatë një vizite zyrtare në Tiranë.

“Kjo do të bëjë që procesi i transferimit të kriminelëve shqiptarë dhe atyre që janë në konflikt me statusin e tyre të imigracionit të jetë më i lehtë dhe më i shpejtë”, thanë burime të Home Office për The Telegraph.

Marrëveshja e re vjen në mes të shqetësimit në rritje për numrin e shtetasve të huaj në burg në Angli dhe Uells. Një në tetë të burgosur është shtetas jo-britanikë, ose 9 mijë 850 persona nga 78 mijë që gjenden prapa hekurave.

Zyrtarët thanë se kjo do të ‘forconte rregullimet ekzistuese që Mbretëria e Bashkuar (MB) ka, për të larguar shtetasit shqiptarë që nuk kanë të drejtë të jenë në MB’.

Patel u shpreh ndër të tjera se mbetet e vendosur që të rregullojë sistemin britanik të imigracionit, të ndalojë hyrjen e paligjshme dhe të heqë ato që nuk kanë të drejtë të jenë në MB “sa më shpejt të jetë e mundur”.

Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.