Teatri  Metropolit ka prezantuar mbrëmjen e djeshme  episodin e parë të ciklit “Dasmat Shqiptare”. Në materialin e parë filmik prezantohen ritet dhe motivet e dasmës së Shqipërisë së Mesme. Pjesëtaret e Ansamblit Tirana kanë interpretuar dhe ilustruar momente te ndryshme nga ceremoniali i dasmës së Shqipërisë së mesme si: momenti në “Shpinë e Dhondrit”, ku “baba, nona dhe motra presin te takojnë miqtë”,  ku “shokët, djemtë e shpisë, nona dhe motrat bëjnë gati dhondrin”. Si dhe momente nga ceremoniali në shtëpinë e nuses si “Nona, shoqet dhe vajzat e shpisë veshin nusen”, apo “Nusja me motrat”, si dhe Nusen e përcjellin nga shpia etj.

Në këtë video jepen hap pas hapi të gjitha parapërgatitjet që kryhen në shtëpinë e bashkëshortëve të ardhshëm si dhe momenti kulmor i dasmës, kur nusja hyn në shtëpinë e dhëndrit deri në kërcimin e fundit që mbyll festën të gjitha këto të shoqëruara me këngët  dhe vallet respektive si “Ra Faja nga Fiku”, “Kërcimi i Napolonit”, Hyri Nusja në Shtëpi”, “Vallja e rrugës” shkruan “Diaspora Shqiptare”.

Ky udhëtim muzikor, etnokulturor dhe antropolog do të vazhdoj në javët në vijim me prezantime të traditave në treva të ndryshme të Shqipërisë.

Projekti “Dasma Shqiptare” ka bërë bashkë artistë të talentuar të Ansamblit Folklorik Tirana me studiues, regjisorë, aktorë, muzikantë popullorë, dizajnerë të kualifikuar, teknikë dhe kostumografë, për të sjellë një produkt përfundimtar sa më cilësor dhe autentik, duke evidentuar veçoritë, ngjashmëritë dhe nuancat e folklorit të dasmave shqiptare, duke përfshirë këngët, vallet, ritualet, kostumet, objektet dhe marrëdhëniet shoqërore në dasmat shqiptare. / Diaspora Shqiptare

Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.