Në Qendrën Kombëtare të Librit dhe leximit organizohet promovimi i librit “Love Songs” të shkrimtarit Skënder Sherifi.

Në aktivitetin “Bashkëbisedim për poezinë”, krahas autorit do të jenë pjesë e panelit dhe shkrimtarja Mimoza Ahmeti dhe Dritan Hoti.

Origjinali i këtij libri është frëngjisht me të njëjtin titull, dhe janë 500 tekste, ka rrëfyer më herët vetë autori. Prej atyre janë marrë 100 tekstet e para dhe janë përshtatur në gjuhën shqipe. Bëhet fjalë për tekste për t’u kënduar dhe interpretuar në muzikë që shkrimtari ua ofron kompozitorëve dhe këngëtarëve të sotëm.

Flasin për dashurinë, pasionin, romantizmin dhe ndjesitë njerëzore dhe janë tekste për shqiptarët në Shqipëri e Kosovë, por mund të lexohen dhe si një libër poezie.

Skënder Sherifi lindi në një familje që është nga Tropoja. Tani jeton në Belgjikë. Ai ka punuar si gazetar i radiove dhe i shtypit belg, (për sektorin e kulturës e artit) ndërsa tani është profesor i gjuhës e letërsisë frënge si dhe i marrëdhënieve publike në një universitet të Brukselit.

“Love”, mbi të cilin bazohet dhe “Love Songs” renditet ndër 10 botimet më të mira në gjuhën frënge për vitin 2008.

Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.