Taulant Mehmeti, kitaristi shqiptar në Shtetet e Bashkuara të Amerikës, në një intervistë tregon për jetën dhe karrierën e tij artistike. Ai flet dhe për albumin e tij të ri dhe planet në vazhdim. Taulanti është vendosur në Nju-Jork nëntë vite më parë ku dhe ushtron aktivitetin e tij artistik.

Ai ka përfunduar studimet në universitetin “The New School” për “Jazz dhe Muzikë Bashkëkohore”, kurse nivelin Master e ka vazhduar në universitetin “SUNY Purchase College”.

“Kam nëntë vite që jam në Amerikë, koha ka kaluar shpejt. Ka qenë e vështirë të mësohem në një vend si Nju Jorku. Duhet të jesh një person shumë aktiv, me dëshirë të madhe për të ecur përpara, dhe për këtë duhet shumë punë. Për të jetuar Jazz-in duhet të vish në një vend si Nju Jorku, sepse këta njerëz këtu e kanë krijuar këtu muzikë. Ndaj këtu është vendi më i mirë për të arritur nivelet më të larta, është fantastike për ta përjetuar këtë muzikë këtu. Këtu të gjithë mund të realizojnë ëndrrat e veta, mjafton dëshira dhe vullneti”, tregon Taulant Mehmeti për RTK.

Artsiti mehmeti tregon se po punon për albumin e tij të ri: “Ka kohë që po mendoj për një album të ri, për të bërë bashkë muzikën e krijuar gjatë kësaj kohe. Kam studiuar disa këngë të vjetra shqiptare, por aktualisht nuk kam punuar një këngë shqiptare, jam ende duke mësuar rreth muzikës balkanike. Herë pas here miksoj këngët jazz amerikane me ritme të këngëve shqiptare”.

Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.