Shumë shpejt do të nisë të vihet në aplikim shpërndarja e grantit prej 5 mijë eurosh për çdo familje emigrantësh që kthehet në Shqipëri për të investuar tek shtëpia e tyre në mënyrë që ta vërë atë në funksion të zhvillimit të agro-turizmit.

Kreu i grupit parlamentar të PS Taulant Balla deklaroi sot nga Rrajca se përpos infrastrukturës dhe ndërtimit të godinave qeveria ka përmbyllur investimin në rrjetin e ujit të pijshëm në mënyrë që kjo zonë të ketë një infrastrukturë komode për turistët.

Lexo edhe- Kryeministri Rama emigrantëve: Grant 5 mijë euro për investime në agro-turizëm

“Thirrja ime është që të gjithë rrajcarët kudo ku ndodhen, është koha ta zhvillojmë duke u fokusuar në këtë pikë. Ne do të fillojmë shumë shpejt të financojmë me një grant prej 5 mijë eurosh çdo familje që ka dëshirë që shtëpinë ta shndërrojë në bujtinë. Është mbyllur edhe investimi në rrjetin e ujit të pijshëm, një investim rreth 5 milion eurosh. Këto investime e bëjnë Rrajcën një zonë më një infrastrukturë komode për turistët”, deklaroi Balla.

Edhe vetë kryeministri Edi Rama më herët ka bërë të ditur nismën 5 mijë euro për çdo shqiptarë jashtë vendit që investon në agroturizëm në vendlindjen e tij.

Ai është shprehur gjithashtu dhe për amnisti fiskale për të ardhurat e tyre nëse zgjedhin ti investojnë në Shqipëri.

“Njëkohësisht do tu bëjmë një amnisti fiskale direkt për kursimet e tyre, për ti sjellë këtu pa i kërkuar llogari se i kanë mbajtur në bankë, apo poshtë jastëkut, mjafton të mos jenë para të krimit, dhe këto para të vijnë këtu se janë para gjaku, janë para djerse e para shqiptarësh dhe të hidhen këtu. Gjithë kjo parajse të fillojnë të shikojë të çelin këto lule të një ekonomie të re”, është shprehur Rama.

Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.