Qendra e Studimeve dhe e Publikimeve për Arbëreshët i ka dhuruar sot katër botimet e publikuara gjatë këtij viti të parë të funksionimit të saj Akademisë së Studimeve Albanologjike. Botimet pjesë e kolanës “Thesaurus”, përfshijnë veprat: “Santori, poet dhe dramaturg”, me autore studiuesen Klara Kodra, “Vepra historiko – filologjike dhe publicistike të De Radës”, e kuruar nga Profesor Jup Kastrati,  ʺNjë rrugëtim në ngulimet arbëresheʺ, nga Anton Bellusci dhe Ornela Radovicka si dhe “Një rrugëtim etnografik mbi veshjet e Arbëreshëve të Italisë së Jugut” me autore dr. Silvana Nini.

Lexo edhe: Kolana “Thesaurus”/ Botohen katër librat e parë të QSPA 

Ky dhurim bëhet jo vetëm në kuadrin e Memorandumit të Bashkëpunimit midis QSPA-së dhe ASA-s, por edhe në kuadrin e destinimit të kushtëzuar ligjërisht të këtyre botimeve për të gjitha qendrat akademike dhe studimore e bibliotekat në territorin e Shqipërisë, Kosovës, Maqedonisë, Italisë së Jugut e Zarës së Kroacisë.

Drejtoresha Ekzekutive prof. Diana Kastrati, e shoqëruar nga Dr. Silvana Nini, autore e njërit prej botimeve të këtij viti, si dhe nga zj. Klevina Zhuri, punonjëse pranë QSPA-së, zhvilluan një takim të përzemërt me Rektorin e ASA-s prof. Marenglen Verli, ku u fol jo vetëm mbi librat, por edhe mbi bashkëpunimet e ardhshme midis këtyre dy institucioneve.

Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.