Drilon Çupi, specialist i mjekësisë interne dhe urgjencës në Gjermani, ka folur për sasinë e vaksinave dhe rolin e tyre në luftën kundër pandemisë.

Mjeku shqiptar ka qenë mjaft aktiv në rajonin ku jeton, në vëzhgimin e procesit të vaksinimit në terren, bashkë me “Kryqin e Kuq” në Gjermani.

“Sot është një fat i mirë që shkenca ka arritur deri aty sa ne të kemi mundësi të shumta në procesin e vaksinimit dhe lloje të ndryshme vaksinash. Kjo na jep shpresë, që do të jetë një periudhë e shkurtër për të dalë nga pandemia”, – shprehet ai.

Përsa i përket procesit të vaksinimit në Shqipëri, dr. Çupi tha se vështirësitë janë në rrafsh global dhe për çdo shtet, por lajm i mirë për vendin është futja në sistemin COVAX.

“Problemi i procesit të vaksinimit dhe global ka krijuar pak konfuzione dhe nuk ka pritshmëritë që kishte në dhjetor. Prandaj vende si Shqipëria që janë jashtë Unionit Europian, të futesh në këtë treg paksa të egër, është shumë e vështirë të fitosh në një kohë sa më të shpejtë numër të mjaftueshëm vaksinash kudo qoftë firma farmaceutike. E vetmja mundësi është me sistemin e COVAX, e cila është përparësi shumë e madhe që Shqipëria bën pjesë aty dhe financiarisht i ka mbyllur kontratat, që do t’i mundësojë Shqipërisë ritme më të larta ta vaksinimit, por do të them që Shqipëria nuk është e vetmja që vuan nga mosmarrja në kohë reale dhe të numrit të caktuar të dozave në këtë kohë, pasi janë shtete shumë më të fuqishme dhe shtete brenda unionit, që kanë pasur pakënaqësi në lidhje me procesin e vaksinimit”, tha ai duke shtuar se hapat e Shqipërisë janë të kënaqshme.

Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.