Pandemia ka prekur çdo sektor të jetës dhe ekonomisë. Tashmë ekonomia, arti e kultura kanë kthyer sytë drejt transmetimeve pa publik e një rrugë e mirë për këtë është dhe transmetimi online.

Këtë mënyrë ka zgjedhur dhe Teatri Massimo Palermo, i cili ka vendosur të hapë një Vebtv ku do të transmetojë shfaqjet për publikun e gjerë. Këtë projekt Teatri e nis me operën-film “Torneranno i bei momenti” (Do të kthehen momentet e bukura), ku duartroktijet e publikut tashmë do të jenë numri i shikimeve online.

Protagoniste e operës bazuar në triologjinë Mozart-Da Ponte, është sopranoja me origjinë shqiptare Enkeleda Kamani.

“Jam shumë e lumtur që jam pjesë e këtij projekti shumë të bukur dhe të veçantë”, shkruan vetë artistja në rrjetët sociale.

Enkeleda Kamani është ndër artistët shqiptarë që ka performuar në teatrin me famë botërore “La Scala” të Milanos, në një moshë fare të re, ku doli e para mes gjashtë finalistëve të Akademisë së Këngëtarëve Operistikë. Suksesi më i madh i saj u shënua pikërisht gjatë këtij viti të vështirë për të gjithë ku gjithçka duhej të mbyllej. Mediat italiane duke folur mbi sukseset e Enkeledës shkruajnë se “një yll i ri ka lindur”.

Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.