Shkrimtari shqiptar në Itali, Gëzim Hajdari, sjell në gjuhën italiane librin “Corpo presente” (Trupi i pranishëm). Ky libër u botua për herë të parë në Tiranë në vitin 1999 dhe vjen në gjuhën italiane nga “Besa Muci Editore”.

Rileximi në këtë botim të ri të lejon të kuptosh më mirë rrugëtimin që ka treguar poeti më herët dhe që ka vazhduar deri më sot. Gëzim Hajdari jeton prej më shumë se dy dekadash në Itali dhe mbetet një prej poetëve më të mëdhenj bashkëkohorë. Ai studioi në universitetin e Elbasanit dhe në universitetin La Sapienza të Romës. Ka botuar vëllime të shumta me poezi , libra udhëtimi, ese dhe ka përkthyer autorë të ndryshëm në shqip dhe në italisht.

Ai është fitues i çmimeve të shumta letrare, president i Qendrës Ndërkombëtare “Eugenio Montale” dhe qytetar nderi i qytetit të Frosinone për meritat letrare. Ka mbajtur konferenca, leksione dhe e ka prezantuar veprën e vet në vende dhe universitete Europiane. Vepra e tij është objekt studimesh akademike në universitete të ndryshme në botë.

Ndër veprat e tjera të shkrimtarit përmendim: “Antologia e shiut”, “Trup i pranishëm”/ “Corpo presente”, “Gjëmë: Genocidi i poezisë shqipe”, “Ombra di cane”/ “Hije qeni”, “Pietre al confine”, “Antologia della pioggia”/ “Antologjia e shiut”, “Erbamara/ Barihidhët”, “Stigmate”/ “Vragë”, “Spine Nere”/ “Gjëmba të zinj”, “Maldiluna”/ “Dhimbjehëne”, “Poema dell’esilio”/ “Poema e mërgimit”, “Peligòrga”/ “Peligorga”, tri përmbledhje me poezi “Poesie scelte” (e fundit në vitin 2021), “Eresia e besa”/ “Herezia dhe besa”, “Delta del tuo fiume”/ “Grykë e lumit tënd”, “Cresce dentro di me un uomo straniero”/ “Rritet brenda meje një njeri i huaj” etj.

Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.