Mjeku shqiptar Genti Metko, punon si Drejtues në Ekipin e Zhvillimeve të Hershme Klinike Onkologjike në Miçigan të Shteteve të Bashkuara të Amerikës. Mjeku i suksesshëm, flet për rolin e vaksinave dhe situatën aktuale pandemike në botë dhe SHBA.
“Numrat e Covid-19, si të infektimeve apo njerëzve të shtruar në spitale, që nga 6 janari vazhdojnë të jenë në rënie dhe ky është lajm shumë i mirë. Kjo nuk do të thotë se ne e kemi kaluar këtë sfidë, sfida vazhdon, ndoshta në një mënyrë më të favorshme për njerëzimin, sepse dhe vaksina është në dispozicion. Një dietë e balancuar, aktiviteti fizik, gjumi i shëndetshëm, të gjithë këta faktorë ndikojnë në fuqizimin e sistemit imunitar të trupit të njeriut”, – shprehet mjeku Metko nga SHBA.
Dr. Metko flet dhe për rastet e personave që e kalojnë më rëndë apo më lehtë situatën e infektimit. “Janë disa njerëz që sistemi imunitar i tyre është disi deficent në një faktor të caktuar që quhet Interferon dhe janë njerëz që kanë mungesë interferoni prandaj kalojnë në një sëmundshmëri më të madhe se pjesa tjetër. Sot prania e informacionit është kudo, të gjitë janë bërë ekspertë por burimi i informacionit është shumë i rëndësishëm”, tha ai.
Përsa i përket kompanive prodhuese të vaksinës, ai thekson se konkurrenca mes kompanive shkencore nxjerr produktin më të mirë, ndërsa agjencitë përkatëse kanë të fortë pika kontrolli.
“Fusha e zbulimeve shkencore që unë bëj pjesë prej 20 vitesh është në përgjithësi e decentralizuar, që do të thotë që është pjesë e atij sistemi dhe asaj politike që më e mira duhet të dalë dhe në bazë të kësaj filozofie shumë kompani, grupe shkencore, futen në garë dhe nuk ka një centralizim me anë të të cilit ti kushtëzon kompani të ndryshme që duhet të ndjekin rregulla të caktuara dhe duhet të prodhojnë këtë apo të lloj vaksine. Ajo që është e rregulluar nga agjencitë shëndetësore është fakti se si duhet të kryhen studimet shkencore. Këtu ke pika kontrolli shumë të mëdha e të forta të cilat monitorojnë studimet nga momenti i parë deri në momentin e fundit sigurinë, monitorojnë efikasitetin, dhe mbrojnë të gjithë ata pacientë apo njerëz që marrin pjesë në studime shkencore. Flasim gjatë fazës që kryen studime shkencore për të bërë një zbulim në rastin tonë të vaksinës. Shpirti i konkurrencës është gjithmonë i pranishëm dhe ky shpirt konkurrence nxjerr rezultatin më të mirë, por ekzistojnë trupa rregullatorë që nuk i lejojnë të veprojnë sipas mënyrave që duan ata, po duhet të ndjekin rregulla strikte përsa i përket sigurisë dhe si do të publikohen të dhënat”, tha më tej ai.
Ai foli dhe për garën e vaksinave ku nga 107 janë përzgjedhur 17, ndërkohë që ai theksoi se bëhet fjalë për autorizim dhe jo aprovim për shkak të kushteve të emergjencës.
“Mesa di unë 107 vaksina janë futur në garë dhe nga këto vetëm 17 kanë arritur të vazhdojnë garën. E nisim nga Pfizer dhe Moderna, të dyja kompani amerikane që morën autorizim dhe jo aprovim dhe kemi folur për këtë që në kushte urgjence trupat rregullatorë mund të autorizojnë jo të aprovojnë, për tu përdorur në emergjencë”, vijoi Dr. Metko.
Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.
