Kreu i Dhomës së Biznesit të Diasporës Ardian Lekaj ka folur mbi projekte konkrete të investimeve të Diasporës në Shqipëri.
“Ka shembuj konkretë të investitorëve nga Diaspora ka dhe shembuj konkret të rritjes së eksporteve nga Shqipëria. Kuptohet që bimët mjekësore kanë qenë gjithmonë një produkt shqiptar që ka dhe ka goxha emër të mirë, por që do kalojmë në një stad tjetër. Të mos jenë vetëm bimë medicinale të mbledhura dhe të kalojmë në përpunimin në vend”, tha Ardian Lekaj në “Pertefol” në Tv Scan.
Duke folur për Dhomën e Biznesit të Diasporës, Lekaj duke iu referuar pandemisë tha se biznesi në çdo periudhë duhet të gjejë shanset për të zhvilluar biznes.
“Në fakt ne lindëm në tërmet dhe po zhvillohemi në pandemi dhe nuk kemi asgjë për tu qarë gjatë gjithë kësaj periudhe dhe pse goxha e vështirë. Në çdo periudhë duhet të gjesh shanset për të zhvilluar biznes”, vijoi ai.
Fillimisht Dhoma ka bërë mbledhjen e informacionit pasi Diaspora Shqiptare është e shpërndare dhe është kryesorja për të nisur punën duke qenë se detyra kryesore është ndërtimi i urave lidhëse.
Lekaj tha se ka mjaft dëshirë nga shqiptarët e Diasporës që të bëjnë biznes në vendin e tyre dhe kjo për të është një mundësi dypalëshe, jo thjesht e investimeve në Shqipëri por dhe çështja e eksporteve në vendet perëndimore.
Përsa i përket klimës së biznesit në Shqipëri ai tha se ka ende shumë për të bërë, sidomos çështja e sigurisë të të bërit biznes dhe lufta ndaj informalitetit.
A ka pasur kërkesa të drejt për drejta për të investuar në Shqipëri?
“Nëse do të kishim një plan të qartë strategjik ekonomik, ku të ishte si makro e mikro, atëherë do të konkretizoheshin më shumë bizneset, fryma e biznesit për të ardhur në Shqipëri. Ne vërtetë mund të themi që turizmi ka prioritet, bujqësia ka prioritet, absolutisht janë dy rrugë shumë interesant për Shqipërinë, por që mos harro. ne si dhomë e biznesit kemi lançuar projektin “Albania dhe gateway to Balkan”, si një korridor strategjik për Ballkanin dhe besoj se kjo strategji do të ishte e mirë për të hapur rrugët të reja për Shqipërinë”, vijoi ai.
Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.
