Qendra Artistike Kulturore Shqiptare “Margarita Xhepa” në Asti të Italisë, vjen me një projekt me fokus gruaja dhe roli i saj në jetën kulturore e artistike në tokën mëmë dhe diasporë.

Tema e parë e takimit është “Zërat femerorë të letërsisë shqipe“ dhe do të fillojë në datë 20 shkurt 2021, duke vazhduar me takime të tjera çdo të shtunë. Kjo qendër ka si qëllim promovimin e vlerave kulturore dhe traditave shqiptare.

Ky projekt, lind si një nevojë e krijimit të një hapësire të shkëmbimit të informacioneve mes të apasionuarave të artit (muzika, vallëzimi, piktura, arkitektura, arredimi, make up-it, erboristeria, luleshtaria, kulinaria, etj), si dhe botës së librit (letërsi, kulturë, edukim shoqëror).

Qëllimi kryesor i këtij laboratori, është ofrimi i një mundësie për një zhvillim dhe pasurim të botës sociale dhe kulturore të gruas. Tematikat do të jenë të larmishme, si dhe pjesëmarrëset do jenë vetë protagoniste të shkëmbimeve të dijeve individuale, qofshin profesionale apo të eksperiencave dhe pasioneve që janë kultivuar në kohë.

Për çdo takim do të ketë një temë, ku secila do të ofrojë kontributin e saj me një poezi, me një tregim, me një propozim titulli leximi, me një rrëfim apo eksperiencë jetësore. Në grup do të jenë të gjitha të barabarta pa krijuar shkallë hierarkie. Propozimet dhe vendimet do të merren së bashku.

Pjesë shoqëruese e takimeve, do të jetë dhe një bufet modest i cili do ndryshojë nga takimi në takim. Pra, një krijim i ri në artin kulinar, i shoqëruar me çajra dhe lëngje të ndryshme në bazë të stinës dhe zgjedhjes simbolike që do t‘i bashkangjitet temës së zgjedhur.

Këto gjetje, kanë si qëllim nxitjen e kreativitetit (cilësi e njohur e gruas), pasurimin shpirtëror dhe mendor, të cilat do të transformohen në një burim energjish pozitive për familjen dhe shoqërinë.

Tema e takimit të parë është “Zërat femërorë të letërsisë shqipe“. Takimet do të zhvillohen të shtunave pasdite, në orën 17:00, pranë Qendrës Artistike e Kulturore “Margarita Xhepa” në Asti të Italisë.

Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.