Virologu shqiptar në SHBA, Arban Domi tha se infektimet me COVID-19, edhe pasi është marrë doza e parë e vaksinës, nuk janë diçka e papritur apo shqetësuese.

Sipas tij, e njëjta gjë mund të ndodhë edhe pasi është marrë doza e dytë e vaksinës, ndërsa koha optimale për të fituar imunitetin e nevojshëm është 2 javë pas dozë së dytë.

“Elementi i parë është se mes dy dozave, mbrojtja jo që nuk është 100 për qind, por është shumë më e ulët dhe kjo shkon sipas vendeve që po bëjnë vaksinimin me Pfizer, ku mbrojtja varion nga 30-60 për qind. Në 10 veta që kanë marrë dozën e parë vetëm 3 në 10 mund të mos infektohen, sepse rreziku vijon të mbetet i lartë. E njëjta ndodh edhe për dozën e dytë, optimalja është 2 javë pas marrjes së dozës së dytë. Nuk është shqetësues infektimi pas dozës së parë dhe të dytë. Nuk është e pamundur që personat të infektohen edhe pas dozës së dytë. Pfizer dhe Moderna nuk janë testuar për të ndaluar infektimin, por për të zbutur efektet që shkakton virusi”, shpjegoi virologu për “Euronews Albania”.

Ai tha se nga studimet e deritanishme rezulton se tri vaksinat e certifikuara anti-COVID veprojnë njëlloj ndaj variantit të ashtuquajtur britanik të virusit, por nuk mund të thuhet e njëjta gjë për variantin brazilian dhe atë të Afrikës së Jugut, që siç tha është zbuluar se arrijnë t’i shpëtojnë përgjigjeve imunitare nga vaksina. “Kemi tri variante më serioze se tjerët, i Britaninë, Afrikës dhe Brazilit. Varianti i ri nuk ka simptoma më të rënda, por përhapet më shpejt. Vaksinat e reja tregojnë se të treja këto vaksina e mbrojnë njësojë variantin britanik, por nuk reagojnë njësoi ndaj variantit Afrikës dhe Brazilit. Nëse mutacionet vazhdojnë të shtohen, a do vazhdojë të bjerë efektiviteti i vaksinës? Dhe për këtë pyetje ende nuk kemi një përgjigje. Ky është problem shqetësues për në si ekspertë.”

Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.