Në komunën e Vaccarizzo Albanese, arbëreshët Natale dhe Pierluigi Godino kanë hapur të parën fabrikë birre agrikulturale. Kjo iniciative është ndërmarrë prej tyre në vitin 2019, pas një tradite të gjatë familjare në prodhimin e vajit të ullirit.

Sipas një artikulli në median italiane “Ecodellojonio”, Natale, përpara se të mendonte mbi biznesin e ri të familjes, kishte ndjekur një kurs për sommelier që e nxiti të mendonte për prodhimin e birrës. Dhe shumë shpejt së bashku me të vëllanë, Pierluigi, këtë mendim e bënë realitet dhe sot kanë fabrikën e birrës që dhe emrin e ka shqiptar “Mirësia”.

Sipërmarrja e tyre është shumë përfshirëse për të dy, pasi që nga kultivimi i bimëve e deri tek përgatitja përfundimtare e shisheve, punë të cilën e bëjnë me përkushtim maksimal. Birra e prodhuar prej tyre, është hapi i parë në projektin për krijimin e një zinxhiri të industrisë agrokulturore në shërbim të kësaj lloj industrie, e cila do të përfshijë krejt jugun e Italisë.

Vaccarizzo Albanese ka pak më shumë se një mijë banorë, ndodhet 448 metra mbi nivelin e detit dhe është një fshat i vogël arbëresh. Një mjedis autentik me pamje nga deti Jon me malet madhështore të Sila. Natale dhe Pierluigi Godino kanë krijuar kështu birrën e shëndetshme, organike që vjen direkt nga toka, nga elbi i rritur dhe i transformuar me duart e sakrificat e tyre.

“Në një gllënjkë të thjeshtë ka aromat e Kalabrisë, nga ata që besuan në atë tokë dhe nuk e braktisën. Por dhe të atyre që besuan mirënjohjen që nuk vonoi shumë të mbërrinte”, përfundon shkrimi.

Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.