Ambasada shqiptare në Vjenë bën të ditur se prej 21 janarit do të ofrojë shërbimin e ri të aplikimit për pasaporta dhe karta ID.
“Të gjithë qytetarët shqiptarë, të cilët jetojnë në Austri, të interesuar për këtë shërbim, luten të aplikojnë për këtë shërbim pranë Ambasadës së RSh Vjenë”, njofton ambasada.
Në nëntor të vitit të shkuar Ministria e Brendshme e Shqipërisë bëri të ditur se hapen gjashtë zyra të reja për aplikimin e dokumenteve biometrike jashtë vendit, duke e çuar në total në mbarë botën në 14 të tilla.
Zyrat e reja të aplikimit hapen pranë Konsullatës në Bari, Itali, si dhe Ambasadave Shqiptare në Vjenë, Austri; në Paris, Francë; në Berlin, Gjermani; në Stokholm, Suedi dhe në Stamboll, Turqi.
Mënyra e aplikimit për këtë shërbim është si më poshtë:
Faza e parë:
1- Klikoni në portalin www.e-albania.al
2- Klikoni butonin ‚Regjistrohu‘
3- Plotësoni të dhënat personale që ju kërkohen dhe përfundoni regjistrimin. Më pas do dërgohet një kod me 4 shifra në numrin tuaj të telefonit ose në emailin tuaj. Atë kod duhet ta vendosni në portal në kuadratin që ju kërkohet dhe në këtë mënyrë regjistrimi përfundohet me sukses.
Faza e dytë:
1- Klikoni në portalin www.e-albania.al
2- Klikoni butonin ‚Hyr‘
3- Vendosni numrin personal, që ndodhet në fund djathtas të dokumentit tuaj të identifikimit dhe hyr në portal.
4- Kërkoni për shërbimin ‘Aplikim për kartë identiteti dhe pasaportë’
5- Krijo një aplikim të ri
6- Plotëso formularin e aplikimit, duke zgjedhur shtetin Austri dhe zyrën konsullore Vjenë
7- Zgjidhni datën dhe orën e takimit në Ambasadë.
8- Përfundo aplikimin.
9- Prisni për emailin e konfirmimit për pranimin e aplikimit tuaj.
“Për çdo vështirësi të hasur në aplikimin tuaj për këtë shërbim, lutemi të na kontaktoni në numrin e telefonit +43 1 328 86 56. Stafi i Ambasadës është i gatshëm për t’ju asistuar për të marrë shërbimin e nevojshëm. Ju kujtojmë që vendosja e maskave FFP2 dhe ruajtja e distancës në ambjentet e ambasadës është e detyrueshme”, thuhet në njoftimin e ambasadës.
Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.
