Uta Ibrahimi njihet si gruaja e parë shqiptare që ngjiti majën më të lartë të botës Everest, ndërsa suksesi i saj i radhës është për malet, por këtë herë jo për ndonjë lartësi shpatesh të Utës, por filmin e saj “Her Story” (Historia e saj).

Përmes një postimi në Facebook Uta bën të ditur se filmi që dokumenton ngjitjen e saj në Everest është vlerësuar me çmimin “Filmi i shkurtër më i mirë për malet” në Festivalin e Filmit në Stamboll.

“Çfarë dite e bukur … Unë jam aq e lumtur që historia ime po fiton njohje ndërkombëtarisht. Ja një ëndërr tjetër që po bëhet realitet në Festivalin e Filmit në Stamboll. Filmi i shkurtër ‘Her Story’ i cili përshkruan përvojën time në Himalajet dhe qëllimin tim për të ngjitur 14×8000 (të katërmbëdhjetë kulmet e botës), u vlerësua me çmimin ‘Best Short Mountain Film Avvard”, ka shkruar Uta.

37-vjeçarja nga Gjilani është diplomuar në Fakultetin Ekonomik të Universitetit të Prishtinës dhe ka 12 vite përvojë pune në marketing.
Gjithashtu ka qenë aktiviste e të drejtave të njeriut, pjesëmarrëse e fushatave sociale që i kanë ndihmuar gratë dhe fëmijët, për pesë vite ka qenë menaxhere e marketingut të festivalit të shquar për dokumentarë DokuFest, organizatore e eventeve, asistente e lëndës së marketingut në universitetin Iliria si dhe në vitin 2017 ka qenë anëtare e jurisë për “Green documentaries”. Në vitin 2015 ajo la punën e saj dhe nisi karrierën si një alpiniste, udhërrëfyese dhe si një “active hiker”.

Ajo ka shprehur gjithnjë bindjen se aktivitetet në natyrë ndikojnë fuqishëm në mirëqenien fizike dhe emocionale të njerëzve. Synimi kryesor i Utës është promovimi i bukurive natyrore të Kosovës dhe të Shqipërisë në botë.

Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.