Kapiteni shqiptar i Dinamos së Zagrebit, Arian Ademi zbuloi se zgjodhi të luante për përfaqësuesen e Maqedonisë së Veriut pas sugjerimit që i bëri lojtari i Kukësit Agim Ibraimi.
Pasi u shpall “Lojtari më i mirë i viti 2020 në kampionatin kroat”, 29-vjeçari zbuloi në një intervistë të gjatë për median kroate “t.portal.hr” se nëse nuk do të kishte përfunduar propozimin e kapitenit të Kukësit, ai nuk do të kishte mundësi të luante në EURO 2020.
“Kur isha fëmijë, shkoja në Maqedoni në çdo stinë të dimrit, ndonjëherë dhe në verë. Prita 3-4 vite për të marrë ftesën e parë në kombëtare. Kam lidhje të forta me këtë vend, gjyshërit e mi kanë lindur këtu, kam shtëpinë e familjes dhe shumë miq e të afërt. Njëri prej tyre është Agim Ibraimi, që ka luajtur me Shkëndijen, Mariborin dhe Astanën pati një rol të madh që unë të pranoja të luaja për Maqedoninë e Veriut. Kushedi, nëse nuk do të ishte ai, ndoshta nuk do ta merrja kurrë këtë ftesë. Por, sigurisht që tani jam i lumtur. Ata më respektojnë shumë”, u shpreh kapiteni i Dinamo Zagrebit, Arian Ademi.
