Jahmir Hyka ka treguar aventurën e tij në Kinë, aty ku kaloi në merkaton e verës te skuadra e divizionit të dytë Huizhu Hengfeng. Në një prononcim të dhënë për “Sport Time”, Hyka ka treguar edhe për mbylljen e karrierës, ku shprehet se e ka menduar edhe rikthimin në kampionatin shqiptar.

“Nuk ka qenë një vit perfekt. Jam një nga më të gjatët këtu. Në fillim kemi pasur problemin e karantinës dhe kur të hyje duhet të qëndrojë 2 javë. Pas karantinës gjithçka ka ecur shumë mirë. Ushqimi këtu është shumë ndryshe. Kam ngrënë shumë oriz, nuk e kisha menduar kështu. Shqipëria me Kinën nuk ka ndonjë ndryshim të madh. I vetmi ndryshim janë lojtarët.”

Ai tregon gjithashtu disa detaje nga skuadra ku luan momentalisht: “Te ekipi ku jam nuk janë pagat si në Superligën kineze. Për ne objektivi ishte të hyjmë në Superligë, por nuk na shkoi ashtu siç duhet. Ndërruam trajnerin dhe ndikoi te psikologjia e ekipit. Besoj se nëse mbajmë ekipin, kemi mundësi për vitin tjetër.”

Hyka tregon se në të ardhmen e shikon veten sërish në Shqipëri. “Të them të drejtën më ka mbetur vetëm Australia. E kam pasur në plan ta mbyllja këtu karrierën. Në mendje kam edhe që ta mbyll në Shqipëri, nuk i dihet.”

Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.