Gërmenj-Shelegur është nga ato rrugë që të fal një pamje piktoreske, peizash mahnitës dhe që të lë pa frymë.

Ndodhet në mes të rrugës Ersekë-Leskovik dhe është afër kufirit me Greqinë. Një pamje e harmonizuar mes maleve me luginat e thella, ligatinat, përrenjtë e rrëmbyer e sidomos pyje të dendur të përzier bredhi e lisi, por ku dominon pisha e zezë.

Tashmë ky rezervat po merr gjithnjë e më shumë vëmendje për turizmin, teksa AdZM Korçë është kujdesur të krijojë shtigje per këmbësore apo dhe vende kampingu.

Krahas vlerave natyrore panoramës mahnitëse, kjo zonë ka dhe një vlerë historike. Këtu kalon dhe rruga e vjetër që përdorej dikur si rrugë e karvanëve mes Janinës në Greqi dhe Korçës. Gjithashtu ndodhet dhe rrënojat e kështjellës së Radanjit, në jug të pyllit të Gërmenjit, ku të ofrohen pamjet e rrënojave të vjetra ilire me një rëndësi të madhe historike.

Për të shkuar atje nuk është shumë e mundimshme. Ndiqni rrugën kombëtare Korçë-Ersekë-Leskovik dhe vendi ndodhet mes fshatit Radanjë e Gërmenj, 25 km pa arritur në Leskovik.

Liqeni i Shelegurit është një tjetër bukuri mahnitëse e kësaj zone, një panoramë e mrekullueshme ku në sfond të shfaqen kreshtat e vargmaleve të Nëmërçkës.

Në këtë udhëtim nuk duhet të harrojmë dhe ujëvarën e Leskovikut, mes kanioneve të thella që ndodhet në anë të rrugës kombëtare Ersekë-Leskovik.